KABAU Baraja BAM

Oleh : Wisran Hadi

wisran-hadi.jpgSamakin koran dibaco, samakin sakik kapalo si Sabai. Lah payah mangarati Sabai jo bahaso koran tu kini. Banyak se kato-kato nan batambah. Kalaulah indak ditarangkan dek Mangkutak, mungkin lah diunggunnyo koran tu dek si Sabai.

“Mang. Ko apo aratinyo ko ha?” tanyo Sabai mampacaliak an surek kaba ka Mangkutak nan baru naiak janjang rumah gadangnyo.
Sasudah Mangkutak duduak baselo, nyo elo angok ciek-ciek. Barulah nyo ambiak surek kaba nan nyo onyok an dek aciaknyo tu. “KABAU baraja BAM.

Kabau tu kapanjangan dari Kepala Bagian umum,” jawek Mangkutak. “Kabau tu urang?” tanyo Sabai tagageh. “Iyo urang. Tenggi pangkeknyo tumah ciak. Kepala Bagian Umum,” jawek Mangkutak. “Satahu den kabau tu kabau. Kerbau. Baa pulo mangko kabau tu baraja bam?” tanyo Sabai. “BAM tu kapanjangannyo Budaya Alam Minangkabau. Jadi kalau Kabau baraja Bam, aratinyo bana, kapalo bagian umum baraja adat budaya alam Minangkabau. Aratinyo bana, urang bapangkek tenggi baraja adat Minangkabau,” kato Mangkutak manjalehan.

“Baraja adat supayo diagiah gala pulo, baitu?” ciloteh Sabai. “Untuang tumah ciak. Sadangkan pangulu se banyak nan indak namuah baraja adat,” jawek Mangkutak. “Ai kiro kabau baraja adat Minangkabau itu mustahil. Indak ka mungkin kabau baraja adat Minangkabau doh Mang,” kato Sabai. “Ciak. Sadang kabau se lai namuah baraja Minangkabau, apo lai urang. Iyo kan?” tanyo Mangkutak. “Kabau baraja Bam, dapek Bos nyo balian ka bus. Apo pulo tu aratinyo tu diak oi?” tanyo Sabai sambia mamelok an sangguanyo. “Bos tu kapanjangannyo Bantuan Operasional Sekolah. Bus tu aratinyo oto bus. Jadi, pitih BOS tu langsuang nyo balian ka oto bus,” jawek Mangkutak. “Korupsi kabau tu?” tanyo Sabai tasasak. “Itu bukan korupsi. Tapi kebijakan. Kebijakan kabau,” jawek Mangkutak. “Baco halaman tigo tu ha,” kato Sabai sambia manunjuak koran nan sadang dipacik Mangkutak. “KARO pai ka BIM samo jo KUDIS mambao kado untuk KADA. Apo pulo mukasuiknyo diak oi,” tanyo Sabai.
“KARO kapanjangannyo Kepala Biro. BIM tu kapanjangannyo Bandara Internasional Minangkabau. KUDIS tu kapanjangannyo Kepala Urusan Dinas. KADA tu kapanjangannyo Kepala Daerah. Jadi mukasuik kalimat tu adolah, Kepala Biro pai ka Bandara Internasional Minangkabau, samo-samo jo Kepala Urusan Dinas mambao kado untuk Kepala Daerah,” kato Mangkutak manjalehan. “Kok roman ko urang kini mamakai bahaso, iyo batambah paniang Ai mah Mang,” kato Sabai sambia maelo angok. “Caro babahaso saroman tu adolah kehebatan urang Minang sajak dulu mah ciak,” kato Mangkutak. “Sajak dulu? Indak tahu Ai doh Mang,” kato Sabai. “Danga dek aciak, baa urang Minang ko mamendek-mendek an bahaso. Kurarirutu,” kato Mangkutak. “Kurariritu? Bahaso apo tu sayang?” kato Sabai sambia manulak an kapalo Mangkutak. “Kurarirutu. Kapanjangannyo adolah, pukua bara hari baru tu,” jawek Mangkutak. “Jaweknyo, apo?” tanyo Sabai.

“Tahkura-kura. Antah pukua-pukua bara,” jawek Mangkutak. “O, kalau baitu pandai pulo Ai mah. Matu? Jaweknyo Kencah! Iyo kan?” tanyo Sabai. “Iyo lah santiang aciak mah,” jawek Mangkutak. “Jadi ciak, kalau ado Karo pai ka BIM lah biaso tumah ciak. Kabau baraja Minang, itu lah biaso pulo mah ciak. Nan bedo kalau urang Minang nak jadi Kabau,” jawek Mangkutak. “Tapi waang dek sari kan dilamar untuak jadi laki anak kabau, ndak?” tanyo Sabai. “Iyo ciak. Itu sababnya waden tulak lamaran tu. Lai ka mungkin pulo waden jadi laki anak kabau. Sadang kini se waden lah dituduah jadi anak jawi. Rusak citra den jadinyo,” kato Mangkutak. “Iyo bedo bahaso Minang ko mah Mang. Samakin lamo, samakin kacau,” kato Sabai. “Ciak. Sadang babahaso Minang se awak lah kacau. Apo lai kalau awak lah nak bahaso kabau pulo atau nak babahaso karo bagai,” jawek Mangkutak. (WH)

Sumber : http://www.padangekspres.co.id/content/view/60/60/

~ by Is Sikumbang on February 15, 2008.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: