Alua Balabeh (Kalakuan Alam)

Oleh : AB. Dt Majo Indo, Disadur dari buku Kato Pusako
Sakali aie gadang
Sakali tapian baraliah
Sakali musim batuka
Sakali gadang baganti
Sakali adaik baraliah
Sakali rajo baganti
Sakali angkatan barubah

Rasan aie ka aie
Rasan minyak ka minyak
Nan babungkuih rasan daun
Nan bakabek rasan tali
Rasok aie ka pamatang
Rasok minyak ka kuali

Kayu pulai di koto alam
Batangnyo sandi basandi
Kok pandai didalam alam
Patah tumbuah hilang baganti

Asa batu mambanam
Asa sabuik tarapuang
Asa ayam ka lasuang
Asa itiak ka palimbahan

Babaun bak ambacang
Bajajak bak bakiak
Bauriah bak sipasin
Baruang ruang bak durian
Banabu nabu bak cubadak

Kok gunuang timbunan angina
Kok lurah timbunan aie
Kok lauik timbunan ombak
Kok bukik timbunan paneh
Kok lubang timbunan sarok
Kok taluak timbunan kappa

Tampek barudu di kubangan
Garundang Gadang di aie
Buayo gadang di muaro
Ikan rayo dilautan
Samuik barajo disarangnyo
Ayam Bainduak, siriah bajunjuang

Batanak dipariuak, manumbuak di lasuang

Kabau mangowek, jawi malanguah
Kambiang mambebek, kudo maringkih
Murai bakicau, alang bakulik
Ayam bakukuak
Salamo aie di hilie
Salamotu pulo gagak hitam

Bak aie di daun taleh
Bak ambun di ujuang rumpuik
Bak Abu di ateh tunggue
Bak talua di ujuang tanduak

Tak ado gadiang nan tak ratak
Tak ado mengkudu nan bagatah
Tak ado kilek dek urang buto
Tak ado guruah dek urang pakak
Tak ado panjang nan tak patah
Tak ado leba nan cabiak

Batuang tumbuah di bukunyo
Karambie tumbuah dimatonyo
Kipeh bakipeh bak anggang tabang
Tungkek manungkek bak padi rabah
Kuaik buruang karano sayok
Kuaik ikan karano radai
Kuaik sapik karano kampo

Asiang lubuak asiang ikannyo
Asiang padang asiang bilalangnyo
Asiang nagari asiang langgamnyo
Jaman baraliah musim batuka

Karuah aie dihulu, sampai ka muaro karuahnyo
Kok lah paneh hari, lupo kacang jo kuliknyo
Kok kuriak induaknyo, tibo di anak rintiak juo

Aie cucuran atok, jatuahnyo ka palimbahan juo
Lurah juo nan dituruik aie, aia gadang batu basibak

Hari nan sadang tangah hari
Sadang buntak bayang bayang
Sadang linduang saliguri
Sadang litak litak anjiang
Sadang haniang-haniang buruang
Sadang sunyi urang dikampuang
Sadang rami urang dipakan
Ulang barulang katandaian
Hari nan paneh paneh barangin
Angin babaue guruah tuhue

Lah tabang gagak ka gunuang
Lah pulang itiak disawah
Lah masuak ayam ka kandang
Malangkiang caciang dalam tanah
Tando alamaik harilah sanjo

Badantuang gaga di lauik
Mambantang cahayo kilek
Kulabu ruponyo awan
Manguntua guruah dilangik
Bapiyuah angin di puhun
Bapesong limbubu di udaro
Cando ka runtuah labek ujan

Manjakau sarantang tangan
Mamikua sakuaik bahu
Malompek sa ayun langkah
Bakato sapanjang aka

Mangurangi sio-sio
Malabiahi ancak ancak
Nan bungkuak makanan saruang
Nan bengkok makanan tali

Riwayaik jambi lah tasabuik
Panjang bajelo di silukah
Alun balabeh makonyo cukuik
Sampai ka hulu makonyo sudah

~ by Is Sikumbang on March 30, 2008.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: