CARAMAH URANG DAMAM

Oleh : Wisran Hadi

wisran-hadi.jpgKasudahannyo, runtuah juo rumah gadang Sabai Nan Aluih. Indak runtuah dek gampo, indak runtuah dek diruntuhan atau runtuah dek karano kayu-kayu nan alah lapuak, tapi memang rumah gadang tu bana nan alah layak runtuah.

Gampo tu cuma alasan untuak Mangkutak dapek bantuan gampo sajo nyo tu. Namun dibaliak itu pulo, Mangkutak Alam nan dikenal sabagai urang nan mamahami bana falsafah Minangkabau indak rusuah saketek juo. Indak kayu janjang dikapiang. Baitu bana tekad Mangkutak untuak mambuek baliak rumah gadangnyo.

Lah hampia anam bulan baputa-puta mancari bahan bangunan indak juo ado nan dapek, mako mambana lah Mangkutak ka aciaknyo nan banamo Sabai Nan Aluih tu. “Ciak. Lah ka saluruah alam Minangkabau ko waden mancari bahan bangunan untuak mambuek baliak rumah gadang awak nan alah runtuah ko. Indak ciek juo nan dapek do,” kato Mangkutak. “Kayu kan lai tumbuah juo dirimbo ndak? Tabang molah. Bao urang kampuang bagotong royong,” parentah Sabai. “Lah sarik kayu tu kini ciak. Sagalo kayu nan bisa ditabang lah ditabangi dek urang. Tingga nan ketek-ketek sajo lai. Kecek urang parimbo, tigopuluah tahun lai baru bisa ditabang kayu nan tumbuah kini,” jawek Mangkutak.

“Tigo puluah tahun lai? Lai iduik juo Ai lai tu? Gilo kayu tu mah!” hariak Sabai samo surang. “Kalau baitu, dibuek rumah gadang jo tembok jo simin. Kini, pai ambiak batu untuak mambuek pondasinyo,” parentah Sabai.
Lah tigo bulan pulo Mangkutak mancari batu nan diparentah dek Sabai. Indak juo ado nan dapek. Mambana pulo baliak Mangkutak ka aciaknyo

“Ciak. Iyo lai banyak batu nan baserak-serak. Tapi indak ado batu nan sasuai untuak pondasi, apo lai untuak sandinyo,” kato Mangkutak.”Baa baitu?” tanyo Sabai. “Sado batu lah baosoang pulo ka Singapura,” jawek Mangkutak. “O, jadi indak hanyo kasiak nan dijua ka Singapura tu doh? Batu iyo pulo? Sudahlah. Kalau baitu, awak buek rumah gadang nan rangkonyo dari aluminium! Pailah bali aluminium tu capek,” parentah Sabai.Pai molah Mangkutak mancari aluminium. Indak pulo ado lai do.

“Ciak Sagalo aluminium lah abih diboroang urang untuak pambuek kapatabang,” kato Mangkutak mambana. “O alah! Jadi jo apo awak buek rumah gadang tu lai? Agak hati Ai, urang-urang tu lah sapakat untuk mansabotase adat Minangkabau ko. Awak harus berjuang terus Mang! Awak harus tagak an rumah gadang! Awak harus tagak an adat jo budaya awak! Barangkek lakeh! Cari apo sajo nan bisa!” parentah Sabai. Duo bulan sasudah parentah kareh si Sabai turun, Mankutak datang pulo manamui aciaknyo tu baliak.

“Baa? Berhasil?” tanyo Sabai sambia tagak pinggang. “Alun lai ciak,” jawek Mangkutak. “Hantu! Untuak mambuek kantua DPR, mambuek mall, mambuek restoran capek waang manyudahannyo! Tapi untuak kepentingan adat jo budaya awak, sangajo waang palambek-lambek!” pakiak si Sabai. Sasudah bapikie tigo minggu, mangeceklah Mangkutak baiyo-iyo jo aciaknyo nan suko naiak darah tu. “Kok baitu baa ciak. Babaliak awak ka pangajian samulo,” kato Mangkutak.

“Pangajian nan ma?” tanyo Sabai. “Rumah gadang di Minangkabau ko ditagakan musti berdasarkan adat Minangkabau. Basandikan adat Minangkabau. Mukasuiknyo, rumah gadang harus tagak dalam lingkungan adat jo budaya Minangkabau. Jadi, nan paralu dalam managak an rumah gadang adolah adat. Bukan kayu, bukan batu, bukan aluminium,” kato Mangkutak. “Baa tadi tu? Rumah gadang ditagak an musti basandi adat? Baitu? Ha, tu baa lai?” tanyo Sabai.

“Sandangkan adat nan manjadi sandi rumah gadang awak tu harus sasuia pulo jo falsafah Minangkabau. Adat basandi syara’, syara’ basandi kitabullah. Mako, dari itu kalau awak ka managaka an rumah gadang ko ke depan, kito indak paralu kayu, batu, kareke, kasiak, aluminium, simin, tembok lai!” kato Mangkutak manarangkan.
Sabai tamanuang. Bantuak apo pulo agaknyo rumah gadang saroman nan dimukasuik adiak kanduangnyo tu.

“Baa mangko haniang sajo aciak? Lai tamakan pangajian awak den aciak?” tanyo Mangkutak. “Takana dek Ai, malam tadi waang lai makan paraksiang?” tanyo Sabai. “Baa baitu ciak?” tanyo Mangkutak. “Kato Ai kok balalu sajo,” jawek Sabai. “Kok balalu bana, baa baitu?” tanyo Mangkutak. “Ceramah adat waang tadi tu, lai indak kecek urang sadang damam tu,” kato Sabai.(WH)

Sumber : http://www.padangekspres.com

~ by Is Sikumbang on March 30, 2008.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: