LAH LAMO NAGARI AWAK KO TAJUA MAH, MANG

Oleh : Wisran Hadi
Kok dikecek an Sabai damam Mama Mia, indak mungkin. Jaankan baranak balaki se alun juo sampai kini lai. Tapi baa mangko Sabai Nan Aluih satiok hari malagu-lagu surang, bajoget-joget surang. Itu nan marusuah dalam hati Mangkutak. Lah nyo carian kasiak tujuah muaro dek Mangkutak untuak maubek Sabai, tapi kasiak-kasiak di muaro tu lah tandeh dek ambiak urang tiok hari. Akibat kasiak abih di muaro, Sabai indak dapek ubek. Akibat indak diubek, batambah maningkat panyakik Sabai tu. Lagu Sabai barubah jadi kata-katai. Maracau-racau, antah apo nan disabuiknyo. Nan marusuah hati Mangkutak, dalam kata-katai tu Sabai manyalahan Tuhan. Iko sangat babahayo. Dek karano gadih rancak kamek nan banamo Sabai Nan Aluih alun juo dapek laki sampai kini, jaan sampai Tuhan pulo nan disalahan.
“Ciak, jo apo aden musti maubek aciak, supayo aciak indak kata-katai satiok hari,” kato Mangkutak baibo hati di sabalah tampek duduak Sabai. Mandanga kecek Mangkutak tu, Sabai langsuang tagak. Inyo berang. “Sudahlah mang! Indak usah waang urus Ai! Buat apa toh! Tuhan pun indak namuah maurus nagari ko lai, dek talampau kacau!” kato Sabai. “Jadi nagari awak ko indak diurus dek lai doh? Baa mangko baitu,” tanyo Mangkutak manuruikan jalan pikiran Sabai. Kalau indak dituruikan jalan pikirannyo, bisa bisa Sabai akan samakin tabik rabo.
“Kalau Tuhan lai maurus nagari ko, tantu lai ka namuah elok nagari ko. Tapi dek karano indak namuah elok juo sampai kini, Ai, yakin, Tuhan alah maninggakan nagari ko. Tuhan labiah namuah maurus urang Japang, Amerika, Rusia, Eropa! Sabab urang disinan lai punyo disiplin, lai punyo raso malu!” kato Sabai saroman urang bakutubah. “Baa mangko co itu bana pandapek aciak. Kok berang Tuhan beko, baa?” kato Mangkutak katakutan. “Tuhan tu kini indak namuah berang lai doh ka urang Indonesia ko! Indak talok berang! Lah berang tuhan, lah nyo datangan tsunami, galodo, kalaparan, tapi nan awak taruih juo maliang! Marampok harato urang miskin! Indak nyo acuahan dek urang awak ko berang Tuhan tu lai doh. Bahkan, urang awak ko pulo nan berang ka Tuhan!” kato Sabai.
“Ha? Baru pulo tadanganyo mah? Urang awak pulo berang ka Tuhan lai. Apo pulo pasalnyo mangko urang awak ko berang ka Tuhan,” tanyo Mangkutak. “Mareka menganggap Tuhan tu banyak cincong! Banyak aturan! Sampai sampai ado urang nan mamakiak ka langik mamberangi Tuhan. Keceknyo, Tuhan! Kebebasan adalah hak kami! Tuhan tidak punya hak membatasi kebebasan kami! Jangan diinjak-injak hak asasi kami! Cubo waang bayangan Mang! Baralah ka somboangnyo urang awak ko? Tuhan nyo berangi pulo”.”Nan mangecek saroman tu kan urang gilo,” kato Mangkutak.
“Gilo? Dek karano sadonyo lah gilo, indak ado urang gilo lai doh,’ kato Sabai pulo.
“Jadi baa nan rancak lai ciak? Awak pangakan nagari awak ko? Kok awak jua se baa? Supayo jaan paniang bana awak mamikiekannyo?” tanyo Mangkutak.
“Eyayai! Lah lamo nagari ko tajua mah Mang!”
“Sia nan mambali?”
“Ma jaleh di Ai! Ai se indak nyo bao bamupakaik doh kutiko ka manjua nagari ko! Ai indak pulo dapek bagian dari panjualan tudoh!,” kato Sabai. “Kok awak mintaTuhan tu baliak maurus nagari awak ko baa ciak?” kato Mangkutak. “E, Mang! Waang kecek an Tuhan saroman urang sumando paganyi? Urang sumando nan suko manggok? Tuhan nan ka waang japuik untuk manyalasaian nagari nan waang kacau sandiri? Waang kecek an Tuhan tu cuma maurus diri waang surang se? Banyak ummat nyo nan elok-elok nan paralu diurusnyo lai.” “Kok lai aciak manjapuik Tuhan tu, tantu lai ka namuah inyo datang.”
“Dek karano Ai padusi lalu Tuhan tu namuah se datang? E, Mang! Tuhan tu jaan waang bayangan saroman laki-laki gata, ndak! Heran Ai dek waang kini mah Mang. Ai pulo nan diajak manjapuik Tuhan. Urang maliang tu suruah manjapuik! Mereka nan mambuek kacau, mereka nan mambuek Tuhan berang, lalu urang nan indak manga-manga disuruah manjapuik Tuhan.”
“Kalau Tuhan indak maurus nagari awak ko, lalu sia nan maurusnyo lai ciak?” tanyo Mangkutak manggigie katakutan.
“Kalau indak Tuhan, tantu setan! Kini nagari awak ko sadang diurus setan, lai tahu waang ndak!”
“Setan atau Isetan?” tanyo Mangkutak ragu. “Waang ruponyo nan sabana setan tu mah!,” hariak si Sabai. (WH)
http://www.padangekspres.co.id/index.php?option=com_content&task=view&id=1101&Itemid=51

~ by Is Sikumbang on April 8, 2008.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: