ORANG GILA BERLADING

Oleh : Wisran Hadi
Kadang-kadang saroman urang maninggan parangai.
Sajak si Atang diangkek manjadi walinagari, bagai-babagai karajo dibueknyo.
Biasonyo hari pakan hari Jumat, nyo ganti jo hari Salasa.
Urang heboh.
Tapi si Atang sambie maapuhi-apuih sunguiknyo, mangecekan bahaso hari Jumat adolah hari untuak beribadat.
Jaan hari Jumat tu dicampua-campua jo urusan duniawi.
“Hari Jumat lauk-lauk di lawik indak namuah makan umpan. Itu sababnya nelayan indak namuah turun ka lauik hari Jumat,” katonyo mambari alasan.
Bialah banyak urang nan indak satuju, inyo indak paduli.
Kini inyo nak mangganti namo nagari Saok Laweh tu jo Sayap Lipas.
Sabab, kato sayap lipas sangat cocok jo sifat urang nagari Saok Laweh.
Urang Saok Laweh suko marantau, tabang, kalau jatuah bana lipeh tu tatilantang, kuciang se indak namuah mamakan doh.
Banyak datuak-datuak di nagari tu nan gelisah.
Nan iko alun salasai, tibo pulo parentah dari Bapak Atang bahaso urang Saok Laweh indak buliah makan samba jariang.
Samba jariang dapek marusak kesehatan.
Salaian baunnyo busuak, jariang dapek menyebabkan asam urat naiak.
Padohal samba jariang tu adolah samba adat urang Saok Laweh.
Kalau indak tahidang samba jariang, rapek adat bisa batal.
Baitu bana pentingnya samba jariang tu.
Kini itu bana nan dilarang dek Bapak Atang.
Baa indak ka heboh urang sanagarinyo.
Satiok hari babagai parentah dikaluakan dek Bapak Atang. Aneh aneh sadonyo. Ado urang nan galak-galak surang sajo manyimak sagalo perintah Bapak Atang tu, ado nan rusuah bahkan ado nan sakik jantuang.
Dek indak tatahan lai manangguang babagai keanehan tu, akienyo nyo cari si Jila dek datuak-datuak Saok Lawek.
Sabab si Jilalah nan bisa mangecek langsuang jo Bapak Atang.
Mako pailah si Jila manamui si Atang, “Kok tumben?” kato si Atang babahaso Jawa manarimo kadatangan si Jila. Si Jila sakik hati. Nyo cari baleh dek si Jila.
“Iya sih dong,” jawek si Jila.
Sudah tu kaduo sobat palangkin takangkang dek galak karano samo-samo sumbang mangecek jo logat dan bahaso urang lain.
“Baa kaba, mako tangah malam haniang ko waang datang ka rumah den?” tanyo si Atang serius.
“Lah heboh urang sanagari ko dek ulah kalakuan waang! Macam-macam se nan ka waang ubah. Kecek waang nagari ko waang surang se nan punyo,” kato si Jila labiah serius.
“Jadi baa waden. Apo salah waden? Kok den ubah-ubah bana nagariko kan indak ado urang nan ka rugi doh.”
“Soalnyo bukan rugi atau indak. Tapi urang indak namuah sato gilo jo waang doh. Kok gilo waang, gilo sorang selah.”
“Gilo baa waden, Jila?”
“Apo nan takana dek waang, waang karajoan. Indak paduli urang nan ka sakik, urang nan kasusah.”
“Iyo, itulah nan jadi masalah den kini. Sajak jadi wali nagari ko, banyak se keinginan den nan musti den panuhi. Kadang-kadang rasonyo waden nak ka mamakan lamang ula, nak baranang sampai ka Mentawai, nak manggiliangan kaki den ko ka roda kareta api, macam-macam se nan taragak di den. Matoari nan tabik tu nan ka den unja bagai. Pernah pulo waden jatuah, patah kaki den dek malompek dari batang dadok.”
“Lai tahu waang nama panyakik baru nan alun dapek ubeknyo sampai kini lai?” tanyo si Jila.
“Apo tu namo panyakiknyo kawan?” tanyo si Atang.
“Kecek urang Minang, panyakik urang gilo baladiang,” jawek si Jila.
“O, itu namonyo. Orang gila berlading? Tul kan?
Apo tando-tandonyo panyakik tu Jila,” tanyo si Atang baliak.
“Manuruikkan kandak hati surang, dek karano waang lah manjadi walinagari. Indak paduli lai rakyat marasai, indak paduli lai urang nan ka susah. Itu panyakik nan waang idok an kini. Indak ado ubeknyo sampai kini doh,” jawek si Jila.
“Sudahlah Jila. Waang indak manyindia den kan?” runguik si Atang

~ by Is Sikumbang on April 24, 2008.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: