Hiduik Bakarukunan

Oleh : AB. Dt. MAjo Indo

Elok tapian din an mudo
Elok kampuang din an tuo
Elok nagari dek panghulu
Elok musajik dek tuanku
Elok rumah dek bundo kanduang
Nan tuo dipamulie
Nan ketek dikasiahi
Samo gadang lawan bakawan

Barek samo dipikue
Ringan samo dijinjiang
Ka bukik samo mandaki
Ka lurah samo manurun
Sakabek bak siriah
Sarumpun bak sarai
Satampuak bak pinang
Sadanciang bak basi
Saciok bak ayam

Ampek macam limbago urang badunsanak
Jiko jauah cinto mancinto
Jiko hampie jalang manjalang
Kok kakruangan tukuak manukuak
Kok sampik lapang malapangi

Sakain sabaju, salauak sanasi
Sabanta sakalang hulu, salapiak sakatiduran
Saburuak sabaiak, sagolok sagadai
Saharato sapusako, sapandan sapakuburan

Saumpamo aue jo tabiang
Umpamo ikan jo aie
Bak baliuang jo asahan
Bak tangguak jo bingkainyo
Samo saujuik sapanggana
Samo sapaham sahakikaik

Sakektek agiah bacacah
Banyak agiah baumpuak
Hati tungau samo dipalik
Hati gajah samo dilapah
Nan tidak samo dicari
Nan lai samo dimakan

Mandapek samo balabo
Kahilangan samo marugi
Sakik samo disilau
Mati samo dijanguak
Nan rusuah samo dibujuak
Dikaba baiak baimbauan
Dikaba buruak bahambauan

Limbango urang badunsanak
Hanyuik samo dipinteh
Tabanam samo disilam
Tarandam samo basah
Tahampai samo kariang
Hilang samo dicari
Luko samo manyiuik
Sakik samo ma aduah
Tuah samo sakato
Hino samo ditutuik-i
Jauah cinto mancinto
Dakek jalang manjalang
Singkek uleh mauleh
Panjang karek mangarek
Senteang bilai mambilai

Kok kakurangan tukuak manukuak
Kok sampik lapang malapangi
Condoang Samo manungkek
Lamah samo manueh
Rabah samo manupang

Tatilantang samo minum ambun
Tatungkuik samo makan tanah
Tarapuang samo hanyuik
Tarandam samo basah
Tatangguak di ikan samo kakaruangkan
Tatangguak disarok nan samo diserakkan

Titiak samo ditampuang
Maleleh samo dipalik
Urek nan basaluak
Pucuak nan ba-ampeh
Satu nyawo duo badan
Tali jan putuih
Kaiktan jan sakah

Kaluak paku kacang balimbiang
Tampuruang lenggang lenggokkan
Bao manurun ka Saruaso
Tanamlah siriah jo ureknyo
Anak dipangku kamanakan di bimbiang
Urang kampuang di patenggangkan
Tenggang nagari jan binaso
Tenggang sarato jo adaiknyo

Duduak surang basampik sampik
Duduak basamo balapang lapang
Kato surang di bulek-i
Kato basamo di paiyokan

Kamudiak sa antak galah
Kahilia sarangkuah dayuang
Sakato lahie jo batin
Sasusai muluik jo hati

Gadang jan malendo
Panjang jan malindih
Gapuak indak mambuang lamak
Cadiak indak mambuang kawan
Nan elok ambiak jo mupakaik
Nan buruak dibuang jo etongan

Ganggam nan bauntuak
Malu nan tak dapek diagiah
Suku tak dapek dianjak
Kamanakan manyambah lahie
Mamak manyambah dalam batin

Kahilia jalan ka kumani
Sasimpang jalan ka singkarak
Sa ukue mangkonyo jadi
Sasuai mangkonyo rancak

Adaik badunsanak, dunsanak samo dipaliharo
Adaik basuku, suku samo dipaliharo
Adaik sakampuang, kampuang samo dipaliharo
Adaik sanagari, nagari samo dipaliharo
Adaik sabangso, bangso samo dipaliharo
Adaik banegara, negara samo dipaliharo
Sanda basanda bak aue jo tabiang

Adaik hiduik tolong manolong
Mati janguak manjanguak
Tuah manusia samupakaik
Cilako manusia dek basilang

Nagari bapaga undang
Kampuang bapaga buek
Tiok lasuang baa yam gadang
Salah tampuah buliah di ambek

 

~ by Is Sikumbang on April 25, 2008.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: