Fatsal-Fatsal Urang Tak Baradat dan Pituah Simalanca

Fatsal-Fatsal Urang Tak Baradat

  • Suko manginduak. Ka sawah manginduak. Ka balai manginduak. Ka kampuang manginduak. Ka kota manginduak. Abih hari maurus induak-induak. Ndak tantu jam baraja ulah induak-induak. Lupo jo rang rumah nampak induak-induak. Bauak.
  • Suko mangaram. Di rumah mangaram. Di balai mangaram. Di kampuang mangaram. Di rantau mangaram. Siang malam mangaram. Urang karajo awak mangaram. Urang bakureh awak mangaram. Disangko lai kamanateh. Kironyo talua malapeh. Sansai mangaram. Ayam
  • Suko mambulancik. Ka kawan mambulancik. Ka lawan mambulancik. Ka mamak mambulancik. Ka anak mambulancik. Di sapo manyangik. Diimbau manyaringik. Ka lapau wakatu mugarik. Ka surau sangek sarik. Paik.
  • Suko manyasak. Buek acara manyasak. Mamanggia kawan tasasak. Buek baju manyasak. Cetak buku tasasak. Ditoloang inyo galak. Dicuekin kalangnyo bangkak. Maupek upek sambia tagak. Indak malu jo urang banyak. Balak.
  • Suko mambangga ka nan rami. Tiok sabanta maota payi. Dari Bali ka Kinari. Ba oto susuki jimi. Babaju kain goni. Malagak takah pulang aji. Tiok hari carito gaji. Ndak tantu kawan manangi. Kabaji.
  • Suko makan karak. Indah buliah balamak. Asa ado dirarak. Baujuang saketek langsuang dimintak. Labo ketek mintak banyak. Karajo ndak jadi ota dipalamak. Gadang banak.
  • Suko manggaretak. Urang batanyo awak tagak. Kawan konfirmasi awak sadak. Urang baru mancubo awak galak. Kawan balabo awak mintak. Tolan tadorong awak mailak. Mangkutak.
  • Suko mambangga dalam nagari. Awak mamacik janyo awak. Iko dibuek maso awak. Itu sudah karano awak. Etan tarancana buah pikia awak. Lah banyak sudah kutiko awak. Awak pakak.
  • Suko malagu sapanjang musim. Urang baralek inyo malagu. Urang rapek tatap malagu. Musim hujan inyo malagu. Musim panen inyo malagu. Kamalangan malagu. Kamatian malagu juo. Hantu.
  • Suko mambuek utang. Satiok hari mambukak balang. Lah sanjo banyak tagang. Sampai tuo bagalimang. urang tibo inyo manyarang. Urang babaso inyo mangarengkang. Tunjang.

Pituah Simalanca

  • Nak santai payi ka balai. Balai ijan sumbarang balai beko bakandai. Bakandai dek piti banyak indak baa do banyak nan maintai. Tapi kok bakandai dek banyak utang, bisa tagolek tacilantang. Pantang.
  • Nak niro panjeklah anau. Anau ijan sumbarang anau beko kanai tungau. Kalau dijilek tungau kota indak baa, lai kalamak raso badan. Tapi kok dijilek tungau banda, bisa bangkak pangka katiak. Kok katiak tangan bangkak tantulah biaso. Bedonyo kok katiak kaki nan kanai, balah karaso. Sebo.
  • Nak tanduak bantailah kabau. Kabau ijan sumbarang kabau, beko tarambau. Tarambau ka dalam lapau indak baa, banyak nan ka maimbau. Tapi kok tarambau dari surau, tantu lah kapayah guru maimbau. Daripado marusak adat, ancaklah bakirok dari Minangkabau. Sarau.??
  • Nak kulek tanamlah ubi. Ubi ijan sumbarang ubi, beko baganyi. Kok baganyi sanda gurau, indak baa itulah biaso. Tapi kok baganyi indak mangulek, tantulah karano awak palitak. Supayo kapalo tagak ancaklah kaparak. Tanam kaladi kanyang sakulak. Botak.
  • Nak talua paliaro itiak. Itiak ijan sumbarang itiak beko tapakiak. Tapakiak dek labo tandolah taraso sero. Mamakiak dek sarik iduik tando lah payah bausao. Zaman kini lah banyak urang nan mamakiak. Bareh maha minyak naiak, ka balai mambaliak. Cabiak.
  • Nak gapuak makanlah lamak. Lamak ijan sumbarang lamak beko angok jadi sasak. Satiok pagi makan jo banak, bisa sampai ka pontianak. Badan gampa aka samak, tando lah bedo jadi mamak. Kamanakan ka baralek saku awak bakarak, abih pandang uran ka awak. Awak gaek parangai cingkahak, tando punyo aka lah singkek. Singkek dalam maukua ndak baa bisa disambuang ciek ciek. Tapi kok lah cando pangana, alamat, rancaklah payi barubek. Belek.
  • Nak sumbayang ambiaklah uluak. Uluak ijan sumbarang uluak beko lapuak. Hati-hati mamambiak uluak, salah-salah sumbayang jadi pasuak. Kalau sumbayang indak sah, jalan ka sarugo jadi balakuak -lakuak. Lakuak jalan ka koto ado maso ka dipelok. Tapi lah lapuak di makan doso, tando nyawa lah bakaruah. Karuah co aia malanah ndak baa, pagi hari nyo kajaniah. Tapi karuah aia ka diminum, alamat badan kanai kuhua. Bayua.
  • Nak makan pakailah samba. Samba ijan sumbarang samba beko lidah pada. Kalau lidah lah pada, manih golo taraso amba. Kalau banyak makan lado, buang aia tara gaca. Lamo-lamo dalam jamban umum, awak dikatokan urang kalera. Kalera dek panyakik ndak baa, ado maso inyi ka angga. Tapi kalau badan lah disabuik urang kalera, kama juo lai ka ditambah sikola. Sikola ka padang banyak ka dikaja. Tapi kalau sikola ka Japang harapan pandai mambuek honda. Baa pangana.
  • Nak lamak pakailah karuku. Karuku ijan sumbarang karuku beko bisa sampu. Kanai dek sampu gadih marah sajo maubeknyo. Tapi kalau kanai dek sampu jubilih, alamat badan kanai damam. Damam dek pitih ndak baa, banyak nan ka maminang. Tapi kalau damam dek ragi, alamat badan ka malayang. Malang. .
  • Nak hujan mandilah sampai basah. Basah ijan sumbarang basah beko kanai kuah. Nak mancaliak tampek basah, payilah ka lurah. Lurah ijan sumbarang lurah, beko bisa payah. Payah dek maurus harato ndak baa, sabab banyak urang nak minta jatah. Payah dek gigik karanggo, talua bisa pacah. Mararah.
  • Nak batu kalilah banda. Banda ijan sumbarang banda beko bisa gaca. Takuik kanau piluru lari ka pangka. Takuik maju, ijan manyasa. Ado kasampatan langsuang sajo puga. Banyak malamun ilang pangana. Akianyo barandam dalam banda. Masuak banda dangkek, mandi-mandi sambia maota. Kok tacabua ka banda dalam, alamtat pudua lentera. Mati.

Sumber : http://www.padangekspres.co.id/content/view/4849/132/

~ by Is Sikumbang on May 6, 2008.

One Response to “Fatsal-Fatsal Urang Tak Baradat dan Pituah Simalanca”

  1. Numpang ciek.Baraja baciloteh.kok salah tolong ditagua.kok bana bukan dari ambo.kabanaran hanyo dari yg maha kuaso

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: