KEKERASAN DALAM PERADATAN

Oleh : Wisran Hadi / www.padangekspres.co.id

Lah saminggu kapalo si Atang bapaluik jo perban. Saroman aji baru pulang dari Makkah. Itulah upah nan patuik ditarimonya dek karano santiangnyo mangecek pakaro adaik Minangkabau di muko datuak-datuak. Kutiko tu urang kampuang maadokan wirik adaik. Datuak Rarayan manjalehkan pakaro penting dan urgennyo peranan datuak-datuak dalam manjalankan adat Minangkabau ko. Tantang kawajiban-kawajiban jo hak saorang datuak, tantang falsafah jo makna nan takanduang dibaliak pakaian datuak-datuak, tantang sipaik jo tingkah laku datuak-datuak, tantangan baa caro datuak-datuak mamiliah bini, maurus anak jo kamanakan, baa caro manjago jo mamaliharo harato pusako kaum. Sadoyo tu bajalehan dek Datuk Rarayan dengan tujuan supayo dapek manjadi padoman dek anak kamanakan isuak. Banyak datuak-datuak nan hadir kutiko tu. Baitu pulo nan mudo-mudo. Si Atang sato pulo mandangakan.
Lah sampai tangah malam, sagalo datuak lah bapapatah-patitiah, mangecek ka ilie ka mudiak. Mancaritokan baa bana paralu jo bareknyo karajo surang datuak di dalam mambina anak kamanakan. Kalau indak ado datuak-datuak ko lai, mako akan hancualah adat Minangkabau ko isuak. Banyak nan mudo batanyo. Rami bana pangajian adaik sakali tu.
“Atang,” sorak datuk Rarayan ka si Atang nan lalok-lalok ayam basanda di tonggak tapi. “Baa waang mangko indak sato batanyo. Biasonyo kan waang nan paliang banyak batanyo, batanyo sampai takasiak bulan. Kini manga waang haniang sajo. Sakik lidah?” Si Atang tajago. Urang galak kasadonyo.
“Anu mak datuak. Anu. Kok sato awak mangecek kok berang pulo datuak-datuak nan lain beko,” jawek si Atang sambia maapuih liua barih.
“Mangeceklah. Adat Minangkabau ko sangat demokratis. Sia sajo buliah batanyo. Tanyolah apo nan indak jaleh dek waang pakaro datuak-datuak ko. Kutiko datuak-datuak lai sadang bakumpua di siko,” kato datuk Rayayan.
“Jadilah mak datuak,” jawek si Atang. Nyo pelok i duduaknyo. “Awak indak picayo kapado datuak-datuak tu doh,” kato Atang saroman urang indak basalah saketek alah juo. Datuak-datuak nan banyak tu takajuik mandanga kecek si Atang.
“Baa mangko baitu?” tanyo datuak Rarayan.
“Kutiko rapek adaik, datuak-datuak tu kapalonyo lai basaluak,” jawek si Atang.
“Iyo batua, Iyo baitu,” solo datuak Dibanda.
“Tapi kutiko inyo kawin, kaki datuak tu nan basaluak,” baleh si Atang.
“Ha? Kutiko kawin kakinyo basaluak? Bagarah waang, Atang?” datuak Rarayan manyasak an.
“Iyo,” jawek si Atang.
“Duto waang!” hariak datuak Dibanda.
“Iyo bana baitu mak datuak. Kutiko kawin kaki datuak tu bana nan basaluak,” kato si Atang galak sengeang.
Sagalo urang mudo tagalak mandanga kecek si Atang tu. Datuak-datuak nan banyak tu binguang. Mancaliak suok kida, baa mangko nan mudo-mudo tu tagalak. Lah abih nan mudo tu galak, barulah galak pulo datuak-datuak tu. Barulah atuak-atuak tu tahu apo mukasuik si Atang. Kutiko kawin, tantu iyo basaluak kaki datuak tu jo kaki bini datuak tu. Datuak-datuak tu kasudahannyo galak takekeh-kekeh. Tapi datuak Dibanda sakik ati.
“Kalera waang! ” garuang datuak Dibanda.
Datuak Dibanda nan gadang badan tu tagak. Inyo bajalan ka muko si Atang. Diramehnyo baju si Atang, diangkeknyo sampai si Atang tagak. Lah tatagak, masuak tinjunyo ka kapalo si Atang tigo kali.
“Waang kecek an datuak-datuak sarupo kami ko buliah dipagarahan,” kato Datuak Dibanda maampeh an si Atang ka dindiang. Si Atang tasanda, sudah tu tatungkuik ka lantai. Kapalonyo baradu jo galeh nan sadang talatak di lapiak. Urang ribuik. Si Atang tapaso dibao ka rumah sakik. Kapalonyo rangkah, badarah-darah. Tujuah baleh banyak jaiknyo.
“Den kecek an juo sajak sari. Waang bongak! Gadang ontak! Kini baa? Untuang indak tangga kapalo waang tu,” upek si Jila kutiko inyo basuo jo si Atang bisuak paginyo.
“Ampun den, ampun. Ruponyo datuak-datuak kini buliah pulo
main tangan. Main hakim sendiri. Indak pandai lai inyo basilek lidah,” sunguik si Atang.
“Iyo. Itu tamasuak kekerasan dalam peradatan mah Tang. Tapi alun ado undang-undangnyo lai tantang itu. Makonyo, waang indak bisa manuntuik datuak tu doh,” jawek Jila.(Wisran Hadi)

~ by Is Sikumbang on May 8, 2008.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: