DAMAM PISIDINDONESIAYER

Oleh : Wisra Hadi/padang ekspres
Baju aji, kopiah aji langkok jo saroban aji nan dibali abak si Atang katiko naik aji duopuluah taun lampau tatap tasimpan di dalam lamari. Itulah pakaian nan dianggap paliang suci. Abak si Atang cuma mamakainyo sakali-sakali, kutiko harirayo sajo. Saluak, tungkek, baju jo sarawa pangulu nan manjadi kabanggaan mamak dek si Jila, tatap tasimpan pulo dalam lamari. Itulah pakaian kabasaran, pakaian urang-urang baradat. Mamak si Jila mamakai pakaian itu sakali-sakali sajo, kutiko ado acara paradatan.
Sajak si Jila jo si Atang sato damam Tahun Kunjungan Wisata 2008, parewa nan baduo tu tapaso mamakai pakaian aji jo pakaian pangulu tu untuk acara kesenian. Si Atang sato manjadi anggota kesenian qasidah, asmaul husna, mamakai baju aji tu untuk bajoget-joget ketek saroman urang-urang Arab nan stres dek parang Irak. Sabab itulah disabuiknya kesenian nan bernuansa Islam. Sadangkan si Jila nan sato jo kesenian asli Minang, mamakai pakaian pangulu untuk manari silek galombang jo barandai.

Sakali duo kali baju tu dipakai dek si Jila jo si Atang, lai indak baa. Dek karano abak si Atang jo mamak si Jila indak tahu bahaso baju aji jo pakaian pangulu nan tasimpan dalam lamari lai talatak sarupo nan taralah. Sungguhapun na bak kian, sapandai-pandai si Jila jo si Atang manyuruak, kasudahannyo dapek juo. Abak si Atang tarabo, karano baju ajinyo dipakai untuk kaparaluan antah ha ha se! Mamak si Jila mamburangsang, karano pakaian pangulunyo dipakai dek si Jila untuk barandai-randai.

“Handie! Waang pakai pakaian pangulu untuak manari-nari di tanah lapang. Itu namonyo palecehan pakaian adat!” burangsang mamak si Jila ka kamanakannyo nan gadang sarawa tu. “Inyo baitu mah mak datuak. Awak dianjurkan dek apak pariwisata manyambuik tamu sacaro adaik. Tantu awak musti bapakaian adaik. Itulah sababnya awak pakai pakaian pangulu,” jawek si Jila sambia manggigie lutuiknyo.”Waang mananti jo pakaian adaik, tagak baslingkik jo paja-paja uni uda tu. Samantaro turis jo tamu-tamu nan tibo tu apo nan dipakainyo? Urang padusi indak bakutang jo laki-laki basarawa toncik tu nan waang nanti jo baju kabasaran den! Indak ka bapariwisata-pariwisata bagai waang indak anti!

Waang muliekan urang nan datang, tapi waang hino adaik waang sandiri. Waang pakai pakaian kabasaran tu untuk manari-nari, sudah tu aden pulo mamakainyo pai rapek adaik, apo kecek urang beko! Jaan-jaan aden nan dikecek an urang pai manari!” hariak mamak si Jila sambia taburai-burai aie liuanyo baserak sapanuah barando.

Si Atang dapek pambagian pulo. Inyo dihariak sajadi-jadinyo dek abaknyo nan suaronyo saroman parian pacah tu. “Itu pakaian aji! Pakaian ka sarugo, tau waang ndak! Di Makkah den bali! Indak den anduak-anduak bagai tudoh! Den bali kontan di Pasa Seng mah, kambiang! Kini waang bao bajoget-joget sambia balagu-lagu urang badui! Waang lai Isilam atau Yahudi?” “Di tipi iyo baitu juo, oi abak den. Urang balagu Arab, mamakai pakaian Arab, manari caro urang Arab. Apo lai, kini awak musti mamajukan pariwisata. Sadang pilem se kini lah banyak nan mamakai bahaso Arab. Ayat-ayat cinta. Munajad Cinta. Cinta bertasbih. Ondeh abak kanduang den. Lah katinggalan abak komah,” rarau si Atang di suduik dapua.

“Mamakai baju aji sambie bajoget-joget waang kecek an untuak mamajukan pariwisata? Wese umum tu bisa se waang barasihan tiok hari lah hebat waang tumah yuang! Wese kumuah, aie untuak cebok indak iduik. Kunjuangan wisata ota waang! Hantu! Indak ka maju bagai pariwisata waang tu, indak anti!” hariak abak si Atang mambubang sampai ka langik tenggi. “Abak den, oi abak. Awak mamakai pakaian urang Arab nyo,
indak mamakai baju aji bagai doh,” jawek si Atang. “Kok baju Arab, baju Mesir, baju India, baju Pakistan bagai nan den bali di Makkah apo urusan waang! Nan jaleh baju tu baju aji, baju den. Di Makkah den bali! Waden pai ka Makkah tu indak pai perai doh nak kanduang! Den jua tanah den, baru den pai ka Makkah,” baleh abak si Atang.

Kutiko si Jila batamu jo si Atang di lapau Ajomanih, kaduo parewa itu galak bagumam.
“Atang. Ma nan ka awak turuik ko. Anjuran apak-apak dinas pariwisata tu atau tatap mampartahankan adat jo agamo?”
“Awak lah damam ko mah, Jila.”
“Baa baitu? Angek dingin badan waang?”
“Damam Pisidindonesiayer,” jawek si Atang.
“Ha? Virus baru pulo tu? Ma nan labiah ganas pado virus flu buruang?” tanyo si Jila.
“Ma jaleh di den. Nan jaleh awak lah tabao rendong damam pulo. Dek damam, awak indak tau lai nan ma nan pakaian adaik nan ma nan pakaian pananti tamu. Indak tahu lai nan ma baju manari, ma nan baju aji.” (Wisran Hadi)
sumber : http://www.padangekspres.co.id

~ by Is Sikumbang on May 21, 2008.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: