ANAK DARO GATA

Oleh : Wisran Hadi / Padang Ekspres

Kini banyak bana Sabai Nan Aluih dapek undangan baralek. Undangan tu ado nan sagadang lapiak sumbayang, ado pulo nan dimasuak an ka dalam tabuang, sarupo lamang angek. Ado pulo undangan tu saroman baricih pacuan kudo. Babagai-bagai bantuaknyo. Rancak-rancak kasadonyo. Tampek baraleknyo juo bamacam-macam. Ado nan di rumah gadangnyo di kampuang, ado nan di rumah barunyo di kompleks-kompleks parumahan, ado nan di hotel-hotel mewah, ado nan di gedung pertemuan, bahkan ado pulo nan ditangah lapang. Rami Allahurabbi! Sampai ka tangah jalan bapasang tenda, babateh jo kain. Saroman jalan gadang tu dibuek pamarentah hanyo untuak inyo saparinduan.
Kutiko dalam sabuah acara baralek di hotel bintang, Sabai Nan Aluih tagak badakek-dakek jo Mangkutak Alam, adiak kanduangnyo nan santiang tak tabado tu. Kaduonyo antri nak basalaman jo anak daro sarato marapulai. Banyak bana urang nan antri tu. Sampai ado nan tabik paluahnyo. Ado nan paniang dek lamo tagak. Ado nan tasasak kajamban tapi tapaso ditahannyo sajo. Sabai malengong suok kida, mancaliak babagai tingkah, gaya jo kalakuan urang nan datang baralek tu.
“Alek saroman ko gadang jo meriahnyo saroman alek rajo-rajo se tampak di den mah ciak,” kato Mangkutak roman urang babisiak.
“O iyolah! Ikolah nan disabuik dengan alek barajo.
Caliak dek waang tu ha! Anak daro di latakkan di tampek nan tenggi, pakai palaminan bantuak rumah gadang, duduak di ateh kurisi baukie barendo ameh, ” jawek Sabai.
“Takana di den ciak, dari maa awak tahu bahaso rajo-rajo baralek saroman iko?” tanyo Mangkutak.?
“Dari niniak muyang. Alek saroman ko kan samo jo mambangkik batang tarandam,” jawek Sabai tabik suga.
“Tapi kecek aciak dek sari awak ko indak ado barajo-rajo. Dulu aciak basikareh mangatokan bahaso indak ado rajo di Minangkabau ko. Nagari Minangkabau ko nagari demokrasi. Tapi baa kok kutiko baralek awak mamakai caro rajo-rajo? Lai indak salah kecek aciak dek sari tu?” tanyo Mangkutak.
“Iyo. Minangkabau ko indak pernah mengenal rajo-rajo doh. Indak ado rajo di Minangkabau ko doh. Dari dulu sampai kini,” hariak Sabai ka adiaknyo nan nyinyia tu.
“Jadilah kok iyo baitu kecek aciak. Indak ado rajo. Tapi baa mangko dalam tatacara aleknyo dipakai
tatacara rajo-rajo? Kan tandonyo dulu adoh rajo tu? Tapi baa mangko waang aciak se basikareh mangecek an bahaso di Minangkabau indak ado rajo?” tanyo Mangkutak baliak.
“E, waang Mang musti baraja ilmu jiwalah saketek. Psikologi. Kalau waang lai baraja psikologi tu baru waang tahu baa mangko urang Minang baralek saroman alek rajo-rajo.”
“Mukasuik aciak?” tanyo Mangkutak tasasak.
“Di dalam psikologi ado dikecek an saroman ko ha. Satiok urang bansaik salalu barusaho atau balagak saroman urang kayo. Urang handia jo engak salalu barusaho nak diakui sabagai urang cadiak jo pandai. Urang-urang katurunan budak-budak salalu balagak saroman rajo-rajo,” jawek Sabai.
“O, baato ciak! Jadi manuruik aciak awak ko tamasuak katurunan budak-budak?” tanyo Mangkutak tasingguang.
“Eyayai! Ai kecek an tadi, itu kecek urang ahli psikologi. Indak kecek Ai bagai tu doh. Urang nan salalu punyo kakurangan salalu barusaho manutuik kakurangannyo. Itu namonyo konpensasi.”
“O, jadi konpansasi dari katurunan budak-budak tu salalu barusaho tampak saroman rajo? Kalau baitu, alek saroman ko alek budak-budak tu? Alek urang sakik jiwa? Baitu mukasuik aciak?” solo Mangkutak.
“Bilalang balagak alang. Kuciang balagak rimau. Mie balagak jadi caciang. Caciang balagak ula.
Urang bansaik balagak jadi urang kayo. Kan biaso nyo tu diak kanduang oi,” jawek Sabai sambia mampatauik an garamannyo dek berang. Sudah basalaman jo anak ratao sarato marapulai, mareka pun antri pulo maambiak makanan.
“Maisi buku tamu antri. Basalam antri. Ambiak makan antri. Lah dapek nasi makan tagak. Alek rajo saroman apo pulo ko?” garutu Mangkutak.
“Iko lah nan banamo alek Rajo Angek Garang,” jawek Sabai galak sengeang.
Ruponyo sadang batangka-tangka tu anak daro turun dari palaminan. Inyo diiringan dek dayang-dayang manjapuik marapulai muko pintu.
“Manga anak daro tu turun tu ciak?” tanyo Mangkutak.
“Inyo manjapuik marapulai ka pintu gedung hotel ko,” jawek Sabai.
“Baa kok bajapuik bana? Indak tatahan saleronyo dek anak daro tu lai?” tayo Mangkutak.
“Antahlah Mang. Baitu pulo gayanyo kini. Anak daro
manjapuik marapulai,” kato Sabai.
“Anak daro gata tumah ciak,” garutu Mangkutak samo surang. (WH)
http://www.padangekspres.co.id/content/view/6395/132/

~ by Is Sikumbang on June 30, 2008.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: