Arih Bijaksana

Oleh : AB. Dt. Majo Indo

Alun bakilek alah bakalam
Bulan lah songkok tigo puluah
Alun takilek alah takalam
Raso alah tibo didalam tubuah

Tanam aue tanamlah duku
Diparak naneh anak tarusan
Sinan batiak nan babungo
Mamuhue jan mambuku
Mauleh jan mangasan
Disinan cadiak nan baguno

Bak maelo diateh aie
Raso katagang dikanduekan
Raso kakakndue ditagangkan
Tangan badantiang indak putuih
Kandue bajelo indak kusuik

Lenggang lenggoknyo rang kayu tanam
Pado pai suruik nan labiah
Samuik tapijak indak mati
Alu tataruang patah tigo

Tagang dinanti kandue
Kareh dinanti lambuik
Tagang nan bajelo-jelo
Kandue nan badantiang dantiang

Tahu dirantiang nan kamalantiang
Tahu diduri nan kamancucuak
Tahu didahan nan ka mahimpok
Tahu dibatu nan kamanaruang

Ibaraik mamalu ula
Ula dipalu indak mati
Pamalu indak patah
Tanah dipalu indak lambang
Bak maelo rambuik dalam tapuang
Rambuik dielo indak putuih
Tapuang indak taserak

Dalam aie dapek diajuak
Dalam hati siapo nan tahu
Sungguah kawek nan dibantuak
Ikan diaie nan dituju

Angguak anggak geleang amuah
Unjuak nan indak babarikan
Iyokan nan diurang
Lalukan nan diawak

Alun rabah lah kaujuang
Alun pai alah babaliak
Balun babali alah bajua
Balun dimakan alah taraso
Balun dicaliak lah tantu rupo
Tabang mambubuang indak balasie
Inggok dirantiang indak bagoyang

Kurang arih badan cilako
Talampau arih badang binaso
Bagai maraieh tunggue kadado
Bagai manapuak aie didulang
Ula lalok jan dijagokan
Aie nan tanang jan dikaruehi

Aka tajumbai tampek siamang bagayuik
Dahan tajulue bakeh tupai maloncek
Aie nan tanang jan disangko tak babuayo
Ombak nan ketek jan diabaikan
Ma andokkan kuku bak harimau

Pilin kacang nak mamanjek
Pilin jariang nak barisi
Tanang tanang mahanyuikkan
Papek dilua pancuang didalam

Dielo suruik bak batanam
Digapai gapai bak basiang

Lauik sumpu danau singkarak
Bamuaro dakek ka umbilin
Tahu mukasuik urang banyak
Itu nan namo sipaik pamimpin

Kaik bakaik rotan sago
Takaik diaka baha
Dari langik tabarito
Tibo dibumi jadi kaba

~ by Is Sikumbang on July 8, 2008.

2 Responses to “Arih Bijaksana”

  1. Assalamu’alaikum wr wb,

    Dengan segala kerendahan hati kami sekeluarga mengucapkan

    “Selamat Hari Raya Idul Fitri 1429 H”

    Kami sekeluarga mohon maaf lahir dan bathin untuk semua kesalahan, ucapan maupun tingkah laku kami yang tidak menyenangkan, baik yang disengaja maupun yang tidak disengaja. Semoga Allah swt menerima semua amal ibadah kita dibulan Ramadhan yang akan segera berlalu.

    Wassalamu’alaikum wr wb.
    Z.KAHAR

  2. ondeh, iko nan awak cari pak. soalnyo banyak nan cuma maabiak sapotong, yang akhirnyo cuma kesimpulan berdasarkan potongan itu untuak mampajaleh egoisme seeorang sajo. tarimo kasih banyak pak dewis

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: