Cioteh WH :Tatolong Ai Jadi Calon Dek Lampu Mati

Oleh : Wisran Hadi/Padang Ekspres

“Ai paralu tando tangan tigopuluah ribu,” kato Sabai Nan Aluih kutiko Mangkutak malapehan tarangah duduak di ateh lapiak purin di ruang tangah rumah gadang lamo nan ka hampia runtuah.
“Lah bara dapek dek aciak?” tanyo Mangkutak sambia lalu. Inyo indak paduli apo guno tando tangan tu dek Sabai.
“Tujuah,” jawek Sabai.
“Sia sia tu nan tujuah?” tanyo Mangkutak.

“Bako, anak pisang, andan pasumandan, sumando manyumando, pambayan rusuak, kamanakan di bawah luruik, kamanakan di bawah tapak,” jawek Sabai Nan Aluih.?
“Bilo musti dikumpuan tando tangan tu?” tanyo Mangkutak.
“Dedlen nyo tanggal tujuah, pukua tujuah, bulan tujuah, musti dianta tujuah urang, musti dibuek tujuah rangkap,” jawek Sabai.

“O, jadi aciak ka sato pulo mandaftar?” tanyo Mangkutak sambia bakipeh, padohal hari indak angek bagai doh.
“Ai musti sato mampajuangan nasib rakyat. Cubo caliak kini Mang. Listrik mati. Bak kato inyo se mamatian jo maiduik an. Nan rakyat tatap mambaie panuah, indak buliah telat. Nan ka lamak dek kukuran se,” kato Sabai.
“Baa caro aciak mampajuangan supayo peelen tu indak balanteh angan ka masyarakat? Ka aciak tuntuik perusahaan negara tu?” tanyo Mangkutak pulo.

“Kalau lah tapiliah Ai, lah duduak Ai sabagai wakie daerah, Ai akan berjuang sampai titik darah penghabisan untuk mambela rakyat,” kato Sabai basumangat
“Iyo lai ka picayo urang jo kecek aciak tu tu?” tanyo Mangkutak.? “Baa kok baitu waang batanyo?” tanyo Sabai mambaleh.

“Indak eh. Satiok urang ka pamilihan, taruih se rakyat ko nan kanai ota,” jawek Mangkutak.?
“Kini baitu lah Mang. Ai indak ka badebat jo adiak kanduang Ai pakaro janji kampanye doh. Nan jaleh kini, Ai paralu tando tangan tigopuluah ribu kuruang tujuh! Waang sabagai adiak kanduang Ai, wajib mandukuang pancalonan Ai. Waang musti mancarian tando tangan sabanyak mungkin untuak Ai,” parintah Sabai ka adiaknyo nan santiang tu.

“Bara baie ciek tando tangan?” tanyo Mangkutak.
“Hantu! Alun manga-manga lai kepeang! Kepeang! Kumpuan tando tangan tu dulu, baru baretong awak pakaro kepeang,” kato Sabai.
“Indak bisa baitu doh ciak. Alun tando tangan diagiah urang, mereka lah langsuang mananyoan bara pitihnyo,” jawek Mangkutak.

“Tapi Ai ka mampajuangkan nasib mereka. Baa kok mintak dibaie pulo,” hariak Sabai.
“Bajuang iyo bajuang ciak. Tapi nan pitih tando tangan musti awak baie dulu. Kini main kuwitansi kosoang indak zaman nyo lai doh ciak,” baleh Mangkutak.
“Jadilah. Ciek tando tangan limo puluah ribu. Tapi baru Ai baie bilo tando tangan tu lah disarahan ka tangan Ai. Bisa?” tanyo Sabai.

“Komisi untuk den bara ciak?” tanyo Mangkutak.
“Iyo mintak ampun Ai Mang. Stek stek komisi. Baa ka maju demokrasi awak ko, kalau baitu caro urang bademokrasi,” garuang Sabai.
“Ciak. Waden nan mintak tando tangan, tantu waden nan dituntuik nantik dek urang banyak. Indak aciak doh. Aciak kan tarimo barasiah sajo. Nan bakubang waden. Kan pantas pulo waden dibaie agak saketek,” solang Mangkutak.

“Sudah. Sudah. Kalau waang indak namuah indak baa! Bia Ai surang nan mangumpuan tando tangan urang tu,” hariak Sabai.
Dedlen tanggal tujuah tibo. Sabai musti manyarahan bukti tando tangan ka panitia pemilihan calon. Sabai indak paduli, lai cukuik tigo puluah ribu tando tangan atau indak. Nan jaleh, nyo bao sagalo apo sajo nan bisa disabuik sabagai tando tangan.

Pulang dari kantua pantia tu, Sabai galak-galak surang duduak di kapalo janjang. Kutiko tu Mangkutak tibo.
“Baa kok galak aciak? Lai lulus aciak jadi calon?” tanyo Mangkutak arok-arok cameh.? “Lai,” jawek Sabai singkek.
“Baa kok bisa lai? Kan tando tangan nan takumpua baru tangah duo ribu nyo. Aciak kicuah panitia pemilihan tu?” tanyo Mangkutak.

“Perjuangan Ai bersih. Indak ado urusan kicuah-kicuah doh Mang,” kato Sabai.?
“Baa kok bisa?” tanyo Mangkutak.
“Kutiko sadang maagiahan tando tangan tu lampu mati. Cukuik tanyo panitia. Cukuik jawek Ai. Oke jawek panitia tu. Tatoloang Ai jadi calon dek lampu mati. Peelen lah manolong Ai, tantu Ai musti manolong peelen tu pulo isuak, ndak Mang?” jawek Sabai Nan Aluih. (WH)

~ by Is Sikumbang on July 28, 2008.

2 Responses to “Cioteh WH :Tatolong Ai Jadi Calon Dek Lampu Mati”

  1. asalam mualaikum niniak mamak yang ado di palanta minang salam taragak sadonyo

  2. batanyo ambo cieg dimaa di jakarta tampek baraja keseniang minang sarupo talempong,randai…mokasih sabalunnyo salam….

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: