Ciloteh WH : NAN PAKAK TU, SIA SABANANYO?

Oleh : Wisran Hadi
“Atang. Guru-guru kini lah banyak nan pai demo. Inyo manuntuik naik gaji. Ado nan manuntuik eskanyo supayo dikaluakan capek. Lah lamo bana guru-guru tu marasai,” kecek si Jila sudah mairuik kopi di lapau Nan Ayang. Si Atang mangguak-angguak balam. “Iyo tu. Lah lamo tapikie di den tu mah. Memang, suatu keharusan pamarentah untuak manaik an harago bebeem. Minyak dunia lah naiak taruih se. Kalau indak dinaiakan harago minyak, baa ka manambah gaji guru,” jawek si Atang.
Si Jila tangango. Baa mangko balaian bana jawek si Atang. Lain ditanyo, lain jaweknyo. Nyo cubo mananyaon sakali lai. Antah kok sadang mangalamun bagai kawan nyo tu.
“Atang. Pitih awak kini lah turun bana haragonyo. Sadolar lah hampia samo jo saratuih ribu. Ndak sansai awak dinyo tu?”
“Jaan cameh bana waang lai Jila. Cadangan devisa awak cukuik. Itu sababnyo awak musti manaik an harago minyak. Soal urang tambah miskin, itu bukan dek karano harago minyak dinaik an, tapi memang dek karano nasib nyo tu bana nan manyurah inyo bansaik,” jawek Atang acuah tak acuah.
Jila tambah tangango. Kok jadi sarupo tu bana si Atang kini. Nyo cubo sakali lai batanyo. Si Jila nak mamastikan, iyo lah barubah bana pandangaran kawannyo tu atau baa?
“Tang. Baa mangko balaian bana waang kini. Lain den tanyo lain pulo jawek waang.”
“Alah Jila. Waang jaan bagarah juo lai. Waang kecek an manurun-nurunan harago tu murah? mpang? Panjang karajonyo tu mah kawan! Labiah murah lai manaik an harago daripado manurunan harago. Kok ka demo bana mahasiswa sa luruah dunia, nan pamarentah tatap ka manaik an harago minyak. Indak mungkin presiden di oyak-oyak bantuak maoyak batang ambacang doh,” jawek Atang.
Kini si Jila lah yakin bana, bahaso pandangaran si Atang iyo lah barubah. Ditanyo a, dijaweknyo e. Dikecek an si Atang ko kini lah gilo, indak mungkin. Inyo lai waras juo baru lai. Dikecek an inyo sadang barasian, inyo lai jago, nyalang juo incek matonyo. Dikecek an inyo damam paneh, badannyo indak pulo angek-angek dingin. Di kecek an inyo indak mambaco stres, tapi inyo lai mambali koran tiok minggu.
Sambilan hari sudah tu baru si Jila tahu baa mangko pandangaran si Atang barubah. Ruponyo sajak mandi-mandi tangah hari tagak di pangka jambatan buai Mato Aia hari Jumat nan lampau, Si Atang tu tasapo. Antah sia nan manyapo indak jaleh. Tapi sajak mandi-mandi tulah pandangaran si Atang indak normal lai. Lain nan dikecek urang, lain pulo nan tadanga dek inyo. Pakak indak, tulipun bukan. Nan tadanga dek inyo kecek inyo surang, kecek urang lain ko tadanga dek nyo saroman buni angin lalu sajo, kaba bagalau.
“Tang. Pandangaran waang kini lah barubah. Waang musti barubek lakeh. Mungkin lah bananah talingo waang tu,” kecek si Jila serius.
“Daulu den pai kaliliang dunia pado waang mah, Jila! Jaan waang ota pulo den lai!” si Atang tarabo.
Si Jila galak takangkang-kangkang! “Lain nan den kecek an, lain pulo nan waang jawek!” hariak si Jilia ka pangka talingo si Atang. “Pakak badak!”
“Sajak bilo tu?” tanyo si Atang galak baguman.
“Waang tasapo!” hariak si Jila manulak an kaniang sulah si Atang.
“Tasapo? Gilo waang! Waden malah nan paliang acok manyapo! Lai ado juo kawan nan sakik lai, aden sapo, sangajo den datang mancaliak mareka tu,” jawek si Atang sambia mairiuk-iruik iduang, bantuak urang kanai salemo tujuah bulan.
“Tang danga kecek den. Aden ingin mamastian bahaso pandangaran waang lai batua. Lai indak pakak badak doh. Buliah?” tanyo Jila.
“Goahed,” jawek si Atang.
“Lai tadanga dek waang bahaso rakyat kini lah sadonyo tapakiak dek samakin hari iduik samakin susah?” tanyo Jila.
“Bohong waang mah! Itu bukan pakiak urang miskin, tapi lagu-lagu dangdut nan sadang dipatandiangan di tipi. Baa waang ko? Sia nan pakak sabananyo ko?” baleh si Atang tarabo.***
http://www.padangekspres.co.id/content/view/6396/132/

~ by Is Sikumbang on October 21, 2008.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: