BAPIKIE SE AWAK, BISA PULO KANAI TANGKOK?


Antah lai inyo ka jadi calon legislatif antah indak, nan jaleh kini si Jila jo si Atang lah samo-samo mampacaiak an isi kapalonyo. Mambuktian ka urang bahaso inyo sebagai calon lai bautak. Untuak mambuktikan bahaso inyo iyo lai bautak, mako badebat pulolah inyo pakaro Piagam Jakarta. Memang baitulah pareman baduo tu. Uru-uru. Urang mangecek pakaro Bungata, inyo sato pulo. Urang bacurito pakaro simin, baliau maningkah pulo.

Urang eboh pakaro Obama, baliau eboh ulo. Kini urang eboh jo Piagam Jakarta, awak lah sato pulo. Antah lai dibaconyo Piagam Jakarta tu andah indak, indak pulo jaleh. Itulah kalabihan urang nan suko minum kopi di lapau Ajo Manih. Nan penting, awak sato!

“Jadi, manuruik waang baa Jila. Iyo lai paralu Piagam Jakarta tu awak ubah. Lai sasuai tu amandemen undang-undang dasar ampek limo. Indak nyo kecek an dek urang beko awak inkonstitusional,” tanyo si Atang, saroman anggota DPR reses ka kampuang-kampuang.

“Tunggu Tang. Waang ko iyo lai sabana mangarati jo Piagam Jakarta tu?”
“Pokoknyo lai. Kan soal penganut Islam nan akan manjalankan syariat ugamonyo. Iyo ndak? Atau salah den?”
“Tu, baa lai?”

“Dek waang baa? Kok diden, tasarah basamo. Kalau sapakaik nak mahanyuik an, anyuik an. Sapakat nak maubah, ubah. Kan indak karamat bana Piagam Jakarta tu doh. Kok hancua lo negara Indonesia ko dek Piagam Jakarta tu rusak, iyolah.”

“Tapi baa mangko dari partai-partai Islam pulo nan indak namuah maubahnyo. Mamasuak an baliak kato-kato tu.”

“Ma jaleh diden. Nan satahu den, nan indak dibuliah diubah tu Quran. Nan lain, lanyau, sasuai jo kahandak basamo. Agak hati den urang-urang di partai Islam tu lah tamakan sagun-sagun pulo. Itu mangko inyo indak satuju Piagam Jakarta tu diubah.”

“Kok diubah bana Tang, iyo lai ado jaminan bahaso urang Islam akan manjalankan syariat ugamonyo? Kini ko tampak diden, indak ado beda antaro urang Islam jo nan indak Islam. Apo lai nan banamo partai-partai Islam. Saroman baruak jo cigak se tampak diden.”

“Jaminan tantu indak. Nan penting diubah dulu. Saindak-indaknyo untuak mambuktikan ka sejarah, bahaso nan indak buliah diubah tu hanyo Quran. Sadangkan deklarasi Amerika se lai baubah kudian. Deklarasi Hak-hak Manusia PBB baitu pulo.”

“Indak namuah maubah Piagam Jakarta tu tamasuak panyakik agaknyo Tang.”
“Panyakik baa?”

“Urang nan suko mangkaramat-karamatkan nan indak paralu dikaramatkan, itu namonyo panyakik jiwa. Pancasila sakti, sasudah disaktikan Suharto runtuah. Istano Basa dikiramaiak . Itu contoh.”

“O jadi, kalau ado urang nan mangkaramatkan sesuatu nan indak karamat, itu tando-tando ka runtuah pulo. Baitu?”
“Lah santiang waang kini tumah.”
“Lai indak ka kanai tangkok awak beko dek bapikie saroman tu ha?”

“Bapikie se kanai tangkok? Bapikie se nyoh? Sadangkan urang nan alah jaleh-jaleh basakongkol mambunuah hakim alun juo dihukum sampai kini doh. Ko awak baru dalam taraf bapikie lah kanai tangkok? Nan kalamak dek kakuran se tumah!”
“Aden lah pancameh bana kini komah, kanti.” ( Wisran Hadi)

~ by Is Sikumbang on February 27, 2009.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: