ADO PULO NAN SANTIANG PADO AWAK LAI

wisran-hadiDi zaman kini ko, zaman nan serba mistik ko, satiok partai punyo calon nan santiang dek didukuang kakuatan mistik. Kalau calon-calon nan didukuang dek partai tu cuma punyo kepeang, dipastikan bisa kalah. Sabab, satiok calon saliang ateh maatehi, nan talok mambaie urang nan ka namuah datang kutiko kampanye. Namun samantanpun baitu, satiok pasangan tatap punyo caro surang-surang pulo untuak manang. Jo caro baserak kepeang nan disabuik sabagai “aleh jajak” itu alah biaso. Indak manjadi rahasio lai. Tapi ado pulo caro nan indak tampak dek urang banyak. Badukun-dukun. Sabananyo, iko pun bukan caro nan baru pulo.
Salamo maso kampanye kini ko, lah banyak dukun turun gunuang, bakaliaran di lua kandang. Macam-macam pulo kurenah jo panampilannyo. Kini, satiok calon jo pasangannyo kalau iyo nak ka manang, musti punyo duo tim. Partamo, tim sukses. Tim sukses tu adolah sakumpulan urang nan namuah disuruah-suruah kaniak kamari, dan musti patuh.
Tim sukses roman ko tampak dek mato urang banyak. Lai manusia juo baru lai. Tapi tim sukses nan kaduo, iko nan paliang penting, namonyo Tim Mejik. Tim pamungkas. Tim Mejik tu tadiri dari kumpulan dukun-dukun jo paranormal. Tugasnyo samo jo Tim Sukses. Samo-samo mamanangkan calon jo wakie nan maupahnyo. Tim sukses caronyo caro kasa, tim mejik tu caronyo jo caro aluih, dek karano anggotanyo urang aluih sadonyo. Urang aluih nan indak masuak ka dalam tim mejik tu hanyolah Sabai Nan Aluih sajo nyo.
Si Atang nan jadi panganggur salamoko, kini lah dapek pekerjaan baru. Manjadi kapalo Tim Mejik dari calon walikota nan banamo Malin Badarun Darun. Limo urang anggotanyo. Tahan sapik tahan guntiang. Tahan pahek jo garagaji. Bisa mambuek lawan takangkang sadang tagak. Sadangkan si Jila manjadi Tim Mejik pulo calon walikota nan banamo Datuak Awang-awang nan di Pasawangan.
“Waang karajoan pulo Datuak Awang-awang nan di Pasawangan yo! Kalera waang Atang! Gugup inyo wakatu manyampaian pidato kutiko pidato kampanye di tanah lapang Simpang Tinju kapatang. Teloh lidahnyo,” sumpah si Jila ka si Atang.
“Waang baa? Waang kan mangarajoan Malin Badarun Darun pulo sabalun tu! Sudah basalam jo dukun panjang jangguik nan waang bao dari Banten tu, Malin Badarun Darun langsuang pai ka wese. Gaca! Anam kali pulang baliak ka wese salamo pidato kampanye. Malu den,” jawek si Atang.
“Iyo tu baa lai kawan. Awak samo-samo ketua Tim Mejik. Nan di muko lawan.”
“Barisuak caliak dek waang! Caliek dek waang! Kok ndak mati tagak calon waang tu, karek talingo den ko dek waang!” rauang si Atang
Ancaman si Atang indak sakadar ota. Duo hari sasudah tu, datang ampek urang dukun. Inyo manari-nari di tanah lapang tampek kampanye bersama calon-caon walikota ko. Dukun tu sangajo manari-nari saroman tu supayo lawan nan kampanye tu takalapua kutiko sadang tagak di mimbar.
Mancaliak ado urang-urang gaek aneh manari-nari di tanah lapang tu, si Jila heran. Lansuang nyo cari si Atang.
“Tang! Waang kecek an kini urang sadang pambukaan Pekan Budaya? Manari-nari di tanah lapang ko? Calon-calon walikota nan ka kampanye bersama ko kini samo-samo sadang mahapa apo nan kadibaconyo. Urang sadang konsentrasi kasadonyo. Jaan mairuak juo waang di siko lai. Malu awak. Kasa bana main waang komah!”
“Bia nak mati tatungkuik kasado calon nan lain tu. Pokoknyo Pak Badarun Darun musti manang. Nan manari-nari tu tau waang ndak? Indak jaleh diang? Itu inyo induak dari sagalo dukun nan waden datangan dari Gunuang Sitoli! Mati lah waang!”
Barisuak pagi, kalua barita di koran. Pak Badarun Darun pansan sasudah kampanye bersama tu. Si Atang nan kabatulan mambaco surek kaba tu tapurangah.
“Babaliak awah panabangan,” bisiak si Atang ka si Jila di lapau Ajo Manih. “Awak juo nan kanai, padohal awak nan mangarajo an! Tanyato di dunia padukunan ko ado pulo urang nan santiang pado awak lai,” kaluah si Atang.
“Itulah waang! Mambao dukun asa lai kadapek se! Anak randai waang kecek an dukun dari Gunuang Sitoli! Untuang indak jo waang waang takalapua!” jawek si Jila dapek angin.
“Baienyo dek saketek bana. Tu nan ma nan namuah se waden suruah manari,” bisiak si Atang di talingo si Jila. (Wisran Hadi)

~ by Is Sikumbang on March 29, 2009.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: