Kabanaran (Nan Bana)

Oleh : AB. Dt. Majo Indo

kompon6Nan disabuik bana adolah

Partamo jujur

Kaduo luruih

Katigo malatakkan sasuatu di tampeknyo

Kaampek lawan bana duto

Asa bana datangnyo dari ampek

macam Partamo dari dalie Tuhan

Kaduo dari Hadih Rasul

Katigo dari kato pusako

Kaampek dari kato mupakaik

Timbue bana dari ampek caro

Partamo dari pikie palito hati

Kaduo nanang hulu bicaro

Katigo haniang saribu aka

Kaampek dek saba bana nan datang

Nan manjauahkan bana ado ampek macam

Partamo karano takuik jo malu

Kaduo karano kasiah jo sayang

Katigo dek balabo karano rugi

Kaampek karano dek dipuji jo disanjuang

Hilang bana dikaranokan ampek macam

Partamo karano banyak bicaro

Kaduo karano kurenah bicaro

Katigo karano muluik manih atau tipu dayo

Kaampek karano bicaro indak hati-hati

Ukue jangko kabanaran

Nak luruih rantangkan tali

Nak tinggi tingkekkan budi

Nak haluih babaso basi

Nak elok lapangkan hati

Nak mulie tapek-i janji

Nak taguah paham dikunci

Nak labo bueklah rugi

Nak kayo kuaik mancari

Nak tuah batabue pudi

Nak namo tingkekkan jaso

Nak pandai rajin baguru

Caro mamakai ukue jangko

Kok mamahek tantang barih

Kok batanam di dalam paga

Kok nak elok salendang dunie

Kok nak ulam pucuak manjulai

Kok nak aie pincuran tabik

Kok nak cincin galanglah dapek

Kok nak kilek cahayo tibo

Kok nak licin bakilek timbue

Kok nak salasai barundiang nan elok

Cinto sampai kandak balaku

Bumi sanang alam santoso

Dunie akiraik jadi santoso

Hilang kabanaran kalua dari ukue jangko

Babicaro bak balalai gajah

Mangecek bak katiak ula

Bakato kapalang aka

Bapikie dek hilang saba

Bailimu kapalang aja

Rumah tampak jalan tak tantu

Angan lalu paham tatumbuak

Cito-cito tinggi iktikaik salah

Ukue sampai jangkolah tibo

Wakatu tibo hukuman jatuah

Takadie Tuhan sadang balaku

Jalan dialiah urang lalu

Cupak dipapek urang panggaleh

Colok tibo ragi barubah

Hilang adaik nan sabananyo

Alue batampuah jalan baturuik

Putiah manahan sasah

Hitam manahan tapo

Indak kuniang dek kunik

Indak lamak karano santan

Ameh tahan uji

Janji batapek-i

Ikrar dimuliekan

Malantiang manuju tampuak

Bakato manuju bana

Maliek contoh ka nan sudah

Maliek tuah ka nan manang

Jan tacurah bak katidiang

Jan baserak bak anjalai

Olok-olok mambao sansai

Garah-garah jadi binaso

Kok dapek hanyo dari mandanga

Baiak disigi ditaliti

Nak jaleh ujuang jo pangka

Supayo indak manyasa kamudian hari

Maago di ateh rupo

Bacupak di ateh tumbuah

Batali buliah diirik

Batampuak buliah dijinjiang

Gajah tadoroang dek gadiangnyo

Harimau talompek dek balangnyo

Tarambau kabau dek rumpuik mudo

Mati ruso dek jajaknyo

Mati kuau dek bunyinyo

Bajalan hati-hati

Mangecek piaro lidah

Mangecek siang liek-liek

Bakato malam mandanga-danga

Bicaro sapatah dipikiri

Bajalan salangkah maadok suruik

Malangkah paliharo kaki

Maliek paliharo mato

Aie nan tanang jan disangko tak babuayo

Aie nan tanang nan mahanyuikkan

Aka tajumbai tampek siamang bagayuik

Dahan tajulai bakeh tupai malompek

Ombak nan ketek jan diabaikan

Nan bana indak barubah

Bakato tatap di nan bana

Nan bana usah dilangkahi

Walau tacacah padang di lihie

Nan bana indak kadiasak

Indak baruntuang babana surang

Mulie diharok hino nan tibo

Babuek baiak pado-padoi

Babuek jahek sakali jangan

Hiduik nan kadipakai

Mati nan kadipagantuangi

Karajo baiak lakeh-lakehkan

Jan ditimpo karajo buruak

Karajo buruak lambek-lambekkan

Kok lai kaditimpo dek nan baiak

Saburuak-buruak untuang maniayo

Sabaiak-baiak untuang taniayo

Allah Ta’ala basipaik kadim

Manusia basipaik gawa

Nan boneh naknyo tingga

Nan hampo naknyo tabang

Nan batakuak nan ditabang

Nan babarih nan dipahek

Tinggi jan bak tinggi karambie

Tambah tinggi mancaliak kateh

Elok bak tinggi batuang

Tambah tinggi mancaliak ka bawah

Nan samba lapa

Nan kasue kantuak

Nan minum auih

Main api anguih

Main aie basah

Manumbuak di lasuang

Batanak di pariuak

Nan diinai kuku

Nan diintai itu

Barundiang jo nan pandai

Bak santan jo tangguli

Barundiang jo nan binguang

Bak alu pancukie duri

Kok nan bana dipabuek

Basaluak carano datang

Kok buruak nan tapabuek

Batimbun sabuik di pungguang

Bangkak manamba, luko manaweh

Karajo baiak baimbauan

Karajo buruak bahambauan

Lalu jarum lalu kulindan

Jan diaja urang tuo makan dadiah

Kok takuik dilambue pasang

Jan barumah di tapi lauik

Kamanakan saparentah mamak

Mamak saparentah bana

Balun sabana mamak

Kok indak bakamanakan

Balun sabana panghulu

Jikok indak baanak buah

Kamanakan barajo ka mamak

Mamak barajo ka panghulu

Panghulu barajo kakato mupakaik

Mupakaik barajo ka nan bana

Nan bana basandi kapatuik jo mungkin

~ by Is Sikumbang on May 4, 2009.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: