Ka Manjadi Urang Nomor Satu

Wisran Hadi (www.padang-today.com)

Si Atang maajak si Jila mangawanannyo manamui katua-katua partai. Untuak apo tu? Inyo baminat pulo manjadi urang nomor satu.

“Ka jadi gubernur pulo waang, Tang? Ka mancalonan?” si Jila menyarengeh.

“Badoso den bacito-cito jadi gubernur? Indak, kan?” gaya bahaso Atang babarek-barekan.

“Ukua bayang-bayang, kawan! Caliak jan ka ateh….”

“Kini namuah waang indak mangawanan den ka kantua partai-partai gadang?”

Jila manjawaek kontan, “Pailah waang surang! Indak kanio bagai den sato gilo doh!”

Nyo caliak lamo-lamo muko si Jila dek si Atang.

“Hei Jila, urang kalau baniak baik, harus didukung. Kok tapilih den, ratak tangan elok, baa pangana? Kini ko, satiok urang bagak-bagak se maju jadi gubermur, bupati, walikota. Indak pantiang se sia inyo, apo nan alah dipabuek salamo ko untuk masyarakaik, nan paralu pede. Picayo diri. Basibagak. Aden maju jadi calon ko Tang, ma tau disasekan hantu. Awak dapek pamimpin kan acok salah pilih, pilihan hantu nan banyak, makonyo nagari ko model iko….”

Agak tapana si Atang. Dipikia-pikianyo, iyo pulo. Urang nan dinilai elok, pintar, santiang manyalasaikan masalah, tapi indak punyo pitih dan indak pandai baduto ka rakyaik, acok kalah dalam pemilihan. Kutiko nyo manjabaik, indak paduli jo nasib rakyaik nan diotanyo dulu.

“Baa kok tapana kawan?”

“Iyo pulo mah. Kok waden jadi wakia baanyo?” kecek si Jila pulo.

Sasak angok si Atang. “Dek tabayang mudah maju-maju ko, langsuang pulo pangana waang ka jadi wakia. Lah duduak den beko, maju sakali lai, lah inkamben den, baru sato waang jadi wakia den Jila. Inokan ko dih!”

Sakali ko agak maangguak-angguak Jila mandanga si Atang. Tapi, nan namo Jila, tatap sajo, kurang yakin. Baa ka indak. Bagak banalah awak maju, pitih dak ado. Partai kini ditanyoi saku-saku mah.

“Modal waang lai gadang, Tang?”

“Makonya den cari pasangan nan banyak pitih, ongok, ingin bakuaso, suko jo pangkek. Itu nan kadijadikan pasangan….”

“Bisa model tu?”

“Ealah, indak jaleh ciek juo dek waang. Kan lah jaleeh dek waang tu, indak kamungkin jadia wakia den waang doh….”

“Kok baitu Tang, jadi molah. Tapi ka kantua partai basuo jo katua atau pengurus partai tu manga, apo tujuan….”

“Mandaftar, ambiak formulir. Sambia dilobi, baitu….”

“Jadi molah. Masyarakaik lai adoh nan ka mandukuang waang Tang?”

Tagalak sengeang si Atang. Nyo pandang si Jila jo bibia taelo ka kida.

“Jan waang remehan den, Jila. Aden lah survey antok-antok. Satiok urang nan den tanyo, mandukuang….”

“Hati-hati jo kecek urang Tang. Urang awak ko, sia se nan tibo, nyo mandukuang mah. Beko kutiko lah pamilihan, indak awak dipilihnyo. Awak takangkang

“Dalam politik itu biaso, Jila. Kicuah mangicuah, itu nan dipahami masyarakaik awak salamo ko sebagai kalakuan politik….”

“Takicuah bagian dari politik mah yo….”

“Iyo. Baa, kan acok waang takicuah….”

“Dek acok takicuah itu pulo makonyo den ragu maaantakan waang mandaftar ka kantua partai untuk jadi calon urang nomor satu….?”

“Baa kok baitu kecek ang? Babiso mah Jila? Berseberangan awak sacaro politik mah?”

“Beko, kecek urang partai tu, Pak Atang dambaan rakyaik. Calon kuat. Kutiko diumumkan sacaro resmi, urang nan lain nan dimajukan….”

“O itu, oke… oke…. Makonyo lobi paralu. Tahu waang apo artinyo lobi?”

Maangguak-angguak sasak angok Jila diremehan model tu. Nyo tunjuak kidaan muka si Atang, “Eh Tang, kalau baitu, balawan awak. Aden maju pulo jadi urang nomor satu. Samo-samo kito caliak, sia nan kadipilih untuk urang kadicalonan mamimpin nagari ko? Atang atau Jila!”

Tagalak si Atang mandanga muncuang-muncuang Jila.

“Kok tapilih waang Jila, gampo nagari ko mah….” Tagalak Atang.

“Kok tapilih pulo waang Tang, jadi juo kiamat 2012 tu mah!”

Lalu, kaduonyo tahanok. “Kalau baitu, simalakamo dek rakyaik ko mah Jila. Bencana nagari kalau salah surang awak tapiliah.

“Jadi baa?”

“Pulang awak dulu. Tanyoan ka rang rumah surang-surang, kalau tagalak nyo, awak batal maju. (Wisran Hadi)

~ by Is Sikumbang on March 7, 2010.

One Response to “Ka Manjadi Urang Nomor Satu”

  1. thanks for informatin

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: