Mancaliak Gampo Bareben Itam

Oleh : Wisran Hadi

Sajak gampo gadang tibo, banyak rumah nan runtuah, banyak urang kamalangan. Ilang anok, ilang badan, ilang anak, ilang bini, ilang dunsanak, ilang kampuang, ilang nagari, sagalanyo lah kailangan. Namun samantangpun baitu, indak banyak nan ilang pangana, dek karano sadonyo urang lai taba imannyo kapado Allah.

Sabai sabagai padusi Minang nan sangat prihatin jo penderitaan urang banyak tu indak katinggalan mampacaliak an kapaduliannyo. Inyo lah basiap-siap nak pai mangunjungi nagari-nagari, kampuang-kampuang nan dapek bancano tu. Kutiko Sabai ka barangkek ka Kinali maanta sumbangan untuak dunsanak-dunsanak nan kamalangan tu, Mangkutak datang.

Tacangang Mangkutak mancaliak gaya jo dandanan aciaknyo tu kini. Sabai mamakai kacomato reben itam, rambuik bakabek jo kain jarang, tas buatan lua nagari, tangan suok bagalang karoncoang satangah lusin, tangan kida bagalang ula 20 ameh, basirawa ketat sahinggo tampak iro-iro kaki Sabai, pakai lontin, subang jo sagalo perhiasan lain. Baunnyo alahurabbi, baun malaikat maraok ka bumi.

Ciak. Nak kamano aciak kini? Nak pai baralek juo aciak lai.Lah saroman ko parasaian urang sanagari alam Minangkabau ko, kato Mangkutak.

Apo kecek waang? Ka pai baralek? Ai ka pai ka Pariaman,taruih ka Kinali, sudah tu ka Pasisie sampai ka Muko-muko. Mancaliak dunsanak-dunsanak awak nan dapek musibah, jawek Sabai.

Kok ka mancaliak urang kamalangan dek kanai gampo, baa kok mamakai reben itam bana aciak ka sinan? tanyo Mangkutak.

Soal Ai mamakai reben itam jaan digugat pulo lai. Itu hak asasi Ai. Kok itam, kok merah, kok kuniang reben Ai, apo paduli waang. Apo lai saroman tren kini, sagalo bini-bini pejabat tenggi musti bareben itam kalau pai mancaliak kamalangan. Kabaa juo, Ai tantu ikuik caro bini-bini pejabat tenggi tu, baleh Sabai.

Iyolah hebat aciak denai ko. Mato urang lah sirah, indak ado aie mato nan dapek kadikaluakannyo lai dek lah sangaik susah, nan aciak bareben itam pulo. Lai manakah tu? kato Mangkutak.

Kalau bareben itam ko Ai, kok manangih bana Ai, kan indak ka nampak dek urang banyak doh, baleh Sabai.

Kok iyo lai bisa aciak manangih mancaliak penderitaan dunsanak-dunsanak awak, kan labiah rancak aie mato aciak tu tampak dek urang banyak. Tapi agak hati den, aciak sangajo mamakai reben itam tu, dek karano takuik mancaliak urang banyak, kato Mangkutak.
Baa kok takuik? tanyo Sabai tacangang.

Dek karano aciak indak bisa gai manangih lai doh. Dek aciak lah sagalo ado. Pitih banyak, rumah rancak, laki bapangkek tenggi, baoto basopir. Indak tahu aciak lai, baa nan sadiah. Indak takana dek aciak lai, baa nan menderita. Aciak indak bisa manangih lai, itu sababnyo aciak tutuik mato aciak jo reben itam tu, kato Mangkutak.
Jaan banyak muncuang waang lai Mang. Kok indak sedih Ai, indak ka pai bagai Ai maanta bantuan tu doh, buransang Sabai.

Bantuan nan aciak anta an ka urang-urang tu kan sumbangan urang-urang nan lain pulo. Nan bantuan dari dompet aciak sandiri apo? tanyo Mangkutak indak namuah kalah. Kalau maanta-anta bantuan urang manga musti bareben itam jo ba tas merek bana, ciak. Malu lah saketek, kato Mangkutak.

Jadi baa mustinyo sikap Ai, tanyo Sabai.

Biaso-biaso sajolah ciak. Kok ibo hati aciak, sadiah aciak, manangih aciak mancaliak penderitaan urang nan banyak tu, manangihlah. Kok indak bisa manangih aciak lai, indak molah. Tapi jaan incek mato aciak tu ditutuik-tutuik pulo jo reben itam tu, kato Mangkutak.

Baa baitu? Kurang etiket Ai kalau pakai reben itam ko? tanyo Sabai.
Kok pai mancaliak pacu kudo, mancaliak urang batandiang alang-alang, indak baa aciak bareben itam doh. Tapi kok mancaliak penderitaan urang aciak mamakai reben itam, dikecek an urang beko aciak indak talok mancaliak urang nan bansaik. Indak tacaliak dek aciak lai penderitaan urang, kato Mangkutak. (Wisran Hadi)

Sumber : http://padang-today.com/?mod=kabagalau&today=detil&id=78


~ by Is Sikumbang on April 15, 2011.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: