Kato Pusako : Rundiang (Bicaro)

Oleh AB. Dt. Majo Indo buku Kato Pusako

Kamuniang ditangah balai

Ditutuah batambah tinggi

Barundiang jo urang tak pandai

Bak alu pancukie duri

Jikok barundiang lah sudah makan

Jikok baranti lah lapeh rarak

Baitu adaik nan biaso

Nankajadi buah rundiang

Ka andai andai urang diladang

Ka bida bida urang dibalai

Rundiang bak katiak ula

Bakato bak bilalai gajah

Rundiang nan tajam dari sambilu

Walau lukonyo indak badarah

Padiahnyo lamo mako ka sanang

Dubalang tagak dipintu mati

Laloknyo siang bajago malam

Tiduenyo balapiak sigaga

Laloknyo bakulambu ransam

Jikok bakato tak balandasan

Kok barundiang balalu lalang

Beda kato jo rundiangan

Kalo kato lapanyo bama’na

Kalau rundiang nan dibicarokan

Mukasuiknyo sampai

 

Ado tigo macamnyo rundiang

Partamo rundiang basimanih

Kaduo rundiang basiginyang

Katigo rundiang basiransang

Nan dikatokan rundiang basimanih

Rundiang nan liuak liuak lembai

Nan lamak manih, sakali rundiang tasabuik

Takana juo salamanyo

 

Nan dikatokan rundiang basiginyang

Rundiang nan tagang tagang kandue

Rundiang nan tinggi tinggi randah

Bak mahelo tali jalo,

jikok kandue ditagangkan,

jikok tagang dikanduekan

Bicaro nan sadang elok sajo

Nan dikatokan rundiang basiransang

Banyak handai jo kucindam

Banyak guluik jo galosang

Kok lalu raso tadorang

Kok suruik raso tataruang

Ditampuah juo kasudahannyo

 

Tigo macam caro barundiang

Partamo tipu aceh

Kaduo gurindam baruih

Katigo tangguak malayu

Nan dikatokan tipu aceh

Disampaikan jo muluik manih

Di ikek jo baso basi

Ditinjau jo aka budi

Muluik manih talempong kato

Baso baiak gulo dibibie

Budi haluih bak lauik dalam

Tampaik bamain aka budi

 

Nan dikatokan gurindam baruih

Dipahaluih rundingan kato

Dipabanyak ragam kecek

Dipaelok tungkuih garam

Dipagadang tungkuih rabuak

Padi dikabek jo daunnyo

Manusia di elo jo akanyo

 

Nan dikatokan tangguak malayu

Tak kaik tumpang manganai

Tak siriah pinang mamalam

Tak tajak taju tajarang

Tak pasin tungguang tibo

Tak laju bandiang mamacah

Tak lalu dandang di aie

Digurun ditanjakkan juo

Masuak juo kasudahannyo

~ by Is Sikumbang on June 29, 2011.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: