Kato Pusako : A K A (AKAL)

Disadur dari buku KATO PUSAKO karya AB. Dt. Majo Indo

Aka ado ampek bagian

Partamo syariaik namonyo

Kaduo tarikaik namonyo

Katigo hakikaik namonyo

Ka ampek makripaik namonyo

Timbuenyo dari ampek macam

Partamo datang dari pikiran sandiri

Kaduo datang dari urang lain

Katigo datang dari ilham

Kaampek dari usaho, karano dipelajari

Katantuan aka ado tigo bagian

Partamo nan wajib

Kaduo nan jais buliah diyakini, atau indak diyakini

Katigo mustahil atau mungkin jadi

Caro manantukannyo ado ampek caronyo

Partamo karano diliek jo mato

Kaduo karano didanga jo talingo

Katigo karano dicium jo hiduang

Kaampek karano dirasokan jo lidah atau dirasokan dek badan

Ma uji aka ado tigo caronyo

Partamo jo dalie nan datang dari Tuhan

Kaduo jo hadih nabi atau rasul

Katigo mambadiang jo laku alam

Badirinyo aka ado limo ujiannyo

Partamo awa lawannyo akie

Kaduo lahie lawannyo batin

Katigo baiak lawannyo jahek

Kaampek ado lawannyo indak ado

Kalimo iyo lawannyo indak

Nan maha kuaso manjadikan sagalo duo

Partamo ateh bawah

Kaduo langik jo bumi

Katigo bulan jo matahari

Ka ampek lautan jo daratan

Kalimo siang jo malam

Kaanam laki laki jo padusi

Katujuah tinggi jo randah

Kasalapan hino jo mulie

Kasambilan kayo jo bangsaik

Kasapuluah sarugo jo narako

Tando urang baraka ado sapuluah macamnyo

Partamo tiok babicaro janiah mukonyo

Kaduo basipaik pangasiah bagi sagalo makhluk

Katigo basipaik pamurah, suko baragiah

Kaampek tiok babicaro salalu manggana bana

Kalimo tiok babicaro dipikiakan baiak buruaknyo

Kaanam indak suko manfitnah jo ma agiah malu kaurang lain

Katujuah basirandah hati taradok sagalo urang

Kasalapan bicaro jo muluik manih

Kasambilan garak garik bicaro mayakinkan

Kasapuluah bapandai pandai mambaokan diri

Martabaik aka ado tigo macamnyo

Partamo sajangka akanyo

Kaduo duo jangka akanyo

Katigo tigo jangka akanyo

Manusia nan sajangka akanyo

Mamandang dirinyo labiah dari urang lain

Itulah urang nan dikatokan takabue

Manusia nan duo jangka akanyo

Urang nan mamandang dirinyo samo rato

Dikatokan urang nan baraka

Manusia nan tigo jangka akanyo

Urang nan mamandang dirinyo abdi Tuhan

Adolah urang nan samparono akanyo

Patuik manjadi contoh tuladan kahidupan

Aturan aka ado tigo macamnyo

Partamo mamaliharo nyawo sampai hiduik indak sampai taniayo

Kaduo mamaliharo tubuah manjago minum makan

Katigo pandai mamaliharo harato bando untuak keselamatan hiduik bakeluarga

Timbangan aka anam macamnyo

Partamo pandai mangati antaro barek jo ringan

Kaduo pandai mangati antaro tinggi jo randah

Katigo pandai mangati antaro rugi jo labo

Kaampek pandai manapekkan antaro hino jo mulie

Kalimo pandai mamakai pakaian nan patuik

Kaanam pandai manjalankan usaho nan mandatangkan faedah jo nan indak bafaedah

Tando urang baraka dibagi duo

Partamo limo macam bantuak lahiriah

Kaduo limo macam bantuak batiniah

Limo macam bantuak lahiriah

Partamo indak banyak bicaro

Kaduo hiduik jo panuah kasabaran

Katigo sipaik nan randah hati

Kaampek bagaue ramah tamah

Kalimo suko pado perbuatan amal soleh

Limo macam bantuak batiniah

Partamo bicaro salalu nan baiak baiak

Kaduo kuiak baibadaik lagi pamurah

Katigo tawaka pado nan maha kuaso

Kaampek manghindari diri dari karajo nan mandatangkan doso

Kalimo manjauahkan diri dari perbuatan jahek

Kapalo aka tigo macamnyo

Partamo mamaafkan sagalo kasalahan manusia

Kaduo barandah hati dalam pergaulan

Katigo babicaro mambaokan taratik jo sopan

Nan mahilangkan aka tigo macamnyo

Partamo karano takuik

Kaduo karano bodoh

Katigo karano malu

Aka pendek manyasekkan

Aka panjang manyampaikan

Lubuak aka tapian budi

Hiduik baraka mati bariman

Sumbayang mancari aka

Rukuak mancari kiro kiro

Hiduik baraka mati bakiro

Abih aka baru tawaka

Kok pandai main aka

Rahasio langik tabaco juo

Kok pandai main aka

Nan takulipik basuo juo

Panjang aka nak malilik

Panjang kecek nak mangabek

Aka dirimbo malilik

Aka manusia mambalik

Dipatah patah bilah mati

Digatie gatie salaronyo

Dipinang pinang lah mati

Dipanciang panciang aka budinyo

Jalin manjalin kain sulam

Sirah hijau bacampue putiah

Makin dikaji makin dalam

Tambah dikacau samakin janiah

Ado limo macam aka

Partamo aka sumbarang aka

Kaduo aka manjala

Katigo aka takumpa

Ka ampek aka tawaka

Kalimo aka sabana aka

Nan dikatokan aka sumbarang aka

Pio kiri pio kanan

Manjala hilie mudiak

Baiak jauah atau dakek

Ba’a kamandapek sajo

Nan dikatokan aka manjala

Manjala hilie mudiak, kiri kanan

Sasiuik namuah ka api

Salewai namuah ka aie

Barang tagendeang namuah maambiak

Nan sajombo nak manuai

Pilin jariang nan barisi

Pilin kacang nak mamanjek

Aka ndak mandapek sajo

Indak dapek kapai kapulang disinggahi juo

Nan dikatokan aka takumpua

Takalok talalu mati

Manyuruak talampaui hilang

Angan lapeh paham tatumbuak

Awak sanang sangketo tibo

Aka ado usaho hilang

Manaruah sagan jo ragu

Nan dikatokan aka tawaka

Apo nan datang dinanti sajo

Basarah diri ka nan maha kuaso

Apo nan tibo ditarimo sajo manyarah kapado nasib

Nan dikatokan aka sabana aka

Sagalo sasuatu diusahokan sampai dapek

Kalau lah diusahokan indak bahasia

Barulah basarah diri pado nan maha kuaso

Indak manarimo takadie sajo

Tapiu bausaho sadapek mungkin

Manyadari juo usaho jo kakuatan nan ado didalam diri

Adopun aka indak sakali tibo

Bicaro indak sakali dapek

Kaputusan indak sakali jadi

Pandapek indak sakali abih

Simpai indak sakali arek

Ujan indak sakali turun

~ by Is Sikumbang on April 21, 2012.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
%d bloggers like this: