BASIRANGKAK ITAM KUKU

Oleh : Wisran Hadi

Lokasi tampek mulo-mulo Sri Maharajo Dirajo jo rombongannyo tibo di lereang Gunung Marapi, salah satu tandonyo disabuik di dalam tambo alam Minangkabau adolah, basirangkak itam kuku. Ikolah persoalan nan manjadi patangkaran antaro Sabai Nan Aluih jo Mangkutak Alam.

“Ciak. Indak masuak ka aka awak do, lai ka mungkin tu ado sirangkak di Gunuang Marapi. Sirangkak tu adonyo di tapi pantai atau di muaro batang aie,” solang Mangkutak, kutiko Sabai Nan Aluih manjalehan tantang asal usul niniak muyang urang Minangkabau. “Jadi baa mukasuik waang?” tanyo Sabai. “Sirangkak tu indak ado di gunuang Marapi do,” jawek Mangkutak. “Tu baa lai?” tanyo Sabai. “Jadi, basirangkak itam kuku, mukasuiknyo adolah tanah nan subur,” jawek Mangkutak. “Tanah nan subur? Baa kok itu pulo terjemahannyo tu diak oi,” kato Sabai.

“Basirangkak tu mukasuiknyo marangkak. Kalau awak marangkak di tanah nan subur, pasti itam kuku awak. Jadi, basirangkak itam kuku, bukan artinyo ado sirangkak di gunung Marapi, tapi kalau marangkak di tanah subur kuku awak pasti jadi itam. Baitu ciak,” kutubah Mangkutak ka aciaknyo nan cadiak cadokio tu.
“O, marangkak mah yo. Itam kuku dek marangkak mah yo,” kato Sabai samo surang sambia maangguak-angguak balam. Antah di ma salahnyo, tibo-tibo saroman angin limbubu, tabik berang si Sabai. Inyo tagak pinggang sambia manggarik-garik an jari-jari tangannyo saroman urang ka rameh-rameh santan. “Santiang waang kini, kapuyuak! Basirangkak itam kuku kecek waang! Itam kuku, kecek waang! Lah pandai bana waang manyindia Ai kini yo!” hariak Sabai. “Manyindia baa waden ciak?” tanyo Mangkutak manggigie dek takuik.

“Mantang-mantang waden pakai kutek itam! Itam aluruah jari den. Waang kecek an itu dek ulah Ai marangkak di lereang gunung Marapi! Lompik! Kantuik abuih! Kalau waang indak katuju Ai pakai kutek itam, indak katuju dek waang kuku Ai itam kasapuluah jarinyo, kecek an taruih tarang! Jaan manyindia-nyindia!” hariak Sabai.
Dek Sabai berang saroman tu, barulah sadar Mangkutak, bahaso aciakyo nan kamek tu, urang nan panggalak jago lalok tu, kini lah mamakai kutek itam pulo, saroman artis-artis takajuik di acara Mamamia. “Ampun den ciak. Ampun baribu kali ampun. Jiko dibuang denai jauah, jiko digantuang denai tenggi. Aciak juo nan kailangan,” kato Mangkutak baibo hati saroman anak randai kanai berang dek induaknyo.

“Ampun ka ampun juo lai! Lah jaleh Ai tasingguang, ampun juo kecek waang! Kok itam bana kasaluruah jari Ai, kan patuik tunyo. Ai mantan Uniuda! Iyo baitu trend urang kini! Kuku itam, calak itam, lipstik itam, rambuik roman bulu jaguang tigo bulan! Itu nan mode kini. Lah katinggalan mode waang mah!” hariak Sabai. ” Kok balang-balang bana kuku aciak, apo paduli den. Tapi nan aciak anak dek Rajo Babandiang. Kakak dek Mangkutak Alam. Indak patuik aciak badandan saroman paja-paja harago kambiang sakupang tu lai do. Aciak musti jago wibawa. Jago citra sebagai anak urang baradaik,” kato Mangkutak manunjuak ajari aciaknyo.
“Emangnya gue pikirin,” garutu Sabai samo surang jo bahaso Batawi.

“Takana dek den ciak, kok bakutek tu aciak tantu indak kanai aie kuku aciak tu ndak ha?” tanyo Mangkutak.
“Apo urusan kuku Ai kanai aie atau indak? Ai makan jo sendok,” kato Sabai. “Kalau indak kanai aie kuku aciak dek bakutek tu, tantu indak sah aciak manjuak aie, ndak ha? Tantu indak sah pulo sumbayang aciak, ndak ha?” kato Mangkutak. “Ai sadang datang bulan!” hariak Sabai. “Kutek itam aciak tu lah sabulan tampak di den aciak pakai. Datang bulan tu bara lamonyo ciak. Sabulan panuah pulo?” solo Mangkutak. “Sudah! Sudah! Kok datang bulan bana Ai, kok ka indak, paduli apo waang. Bulan di ateh, Ai di bawah!” hariak Sabai samakin manjadi-jadi.

“Jadi, aciak indak namuah ditagahan mamakai kutek itam tu doh yo? Kareh kapalo aciak kini yo? Dek ikuik mode, indak namuah aciak mandanga nasehat adiak lai doh yo?” kato Mangkutak. “Bia Ai abihan dulu kutek itam Ai ko. Maha Ai bali di Paris mah. Kalau lah abih, sudah tu indak ka Ai pakai-pakai lah doh,” janji Sabai. “Bara lamo abihnyo kutek itam nan alah aciak bali tu?” tanyo Mangkutak. “Agak tigo tahun lai lah,” jawek Sabai tanang. “Tigo tahun? Jadi, bara boto aciak bali kutek itam tu ha?” tanyo Mangkutak. “Sadorom,” jawek Sabai galak sengeang saroman urang indak babanak. “Manga indak palangkin se aciak bali sakali? Cuma palangkin nan urang jua badorom-dorom tu nyo ciak,” kato Mangkutak. (WH)
Sumber : Padang Ekspress

~ by Is Sikumbang on March 20, 2008.